កាណាដា បានចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគីដ៏ប្រវត្តិសាស្រ្តជាមួយឥណ្ឌូនេស៊ី ដែលមានគោលបំណងលុបបំបាត់ ឬកាត់បន្ថយពន្ធជាង ៩៥% លើការនាំចេញរបស់ទីក្រុងអូតាវ៉ា ទៅកាន់ទីផ្សារធំបំផុតរបស់ខ្លួននៅអាស៊ីអាគ្នេយ៍។

ក្រុមអ្នកជំនាញជាច្រើននិយាយថា កិច្ចព្រមព្រៀងជាយុទ្ធសាស្ត្រនេះកំពុងធ្វើឡើងក្នុងបរិបទនៃភាពចលាចលសេដ្ឋកិច្ចពិភពលោក ដែលកាន់តែធ្ងន់ធ្ងរឡើងថែមទៀតដោយគោលនយោបាយគាំពារនិយមរបស់សហរដ្ឋអាមេរិក។

នាយករដ្ឋមន្ត្រីកាណាដា លោក Mark Carney បាននិយាយថា "នេះគឺជាកិច្ចព្រមព្រៀងដ៏ត្រឹមត្រូវ នៅពេលវេលាដ៏ត្រឹមត្រូវ ជាមួយដៃគូដ៏ត្រឹមត្រូវ" ដោយបន្ថែមថា ឥណ្ឌូនេស៊ី ជាទីផ្សារនាំចេញធំបំផុតរបស់កាណាដា នៅអាស៊ីអាគ្នេយ៍។

ប្រធានាធិបតីឥណ្ឌូនេស៊ី លោក Prabowo Subianto បានហៅកិច្ចព្រមព្រៀងនេះថាជា "ពេលវេលាដ៏ប្រវត្តិសាស្ត្រ" ក្នុងអំឡុងដំណើរទស្សនកិច្ចផ្លូវការទៅកាន់ទីក្រុងអូតាវ៉ា កាលពីថ្ងៃពុធ (២៤ កញ្ញា) ព្រោះកិច្ចព្រមព្រៀងប្រភេទនេះគឺជាលើកដំបូងហើយជាមួយប្រទេសសមាជិកសមាគមប្រជាជាតិអាស៊ីអាគ្នេយ៍ (អាស៊ាន)។

កិច្ចព្រមព្រៀងភាពជាដៃគូសេដ្ឋកិច្ចទូលំទូលាយ (CEPA) មួយនេះ អនុញ្ញាតឱ្យកាណាដា ពង្រឹងវត្តមានរបស់ខ្លួននៅក្នុងតំបន់ឥណ្ឌូប៉ាស៊ីហ្វិក ស្របតាមយុទ្ធសាស្ត្ររបស់រដ្ឋបាលកាណាដាពីមុន។ កិច្ចព្រមព្រៀងនេះក៏លុបបំបាត់ពន្ធជាង ៩០% លើការនាំចូលរបស់ឥណ្ឌូនេស៊ី ដែលជាអត្ថប្រយោជន៍ដល់ការនាំចេញសម្លៀកបំពាក់ និងទំនិញស្បែក ទៅកាន់ទីផ្សារអាមេរិកខាងជើង៕