ក្រុមប្រឹក្សាសន្តិសុខអង្គការសហប្រជាជាតិ (UNSC) នឹងបោះឆ្នោតនៅថ្ងៃសុក្រ (២៦ កញ្ញា) នេះលើសេចក្ដីសម្រេចមួយដែលស្នើឡើងដោយរុស្ស៊ី និងចិន ដើម្បីពន្យារពេលការដាក់ទណ្ឌកម្មឡើងវិញលើអ៊ីរ៉ង់ រយៈពេល ៦ខែ ប៉ុន្តែក្រុមអ្នកការទូតនិយាយថា សេចក្ដីសម្រេចនោះទំនងជាឆ្លងមិនផុតទេ។

គួរឱ្យដឹងថា រាល់ទណ្ឌកម្មរបស់អង្គការសហប្រជាជាតិទាំងអស់លើអ៊ីរ៉ង់ នឹងត្រូវដាក់ឡើងវិញនៅម៉ោងក្នុងស្រុក ៨យប់ថ្ងៃសុក្រនេះ (ត្រូវនឹងម៉ោងសកល ០០:០០ រំលងចូលសៅរ៍) បន្ទាប់ពីមហាអំណាចអឺរ៉ុបទាំងបីគឺចក្រភពអង់គ្លេស បារាំង និងអាល្លឺម៉ង់ បានចាប់ផ្តើមដំណើរការដាក់ទណ្ឌកម្មឡើងវិញរយៈពេល ៣០ថ្ងៃមុន ដោយចោទទីក្រុងតេអេរ៉ង់ ថារំលោភលើកិច្ចព្រមព្រៀងឆ្នាំ២០១៥ ជាមួយមហាអំណាចពិភពលោក ក្នុងគោលបំណងរារាំងអ៊ីរ៉ង់ មិនឱ្យបង្កើតអាវុធនុយក្លេអ៊ែរ។

សេចក្ដីសម្រេចនៅក្នុងក្រុមប្រឹក្សាសន្តិសុខអង្គការសហប្រជាជាតិ ដែលមានសមាជិក ១៥រូប ត្រូវការសំឡេងគាំទ្រយ៉ាងតិច ៩សំឡេង ទើបអាចឆ្លងបាន ហើយមិនមានសិទ្ធិវេតូដោយចក្រភពអង់គ្លេស បារាំង ឬសហរដ្ឋអាមេរិកឡើយ។ យ៉ាងណាមិញ ក្រុមអ្នកការទូតនិយាយថា ទំនងជាមានការអនុប្បវាទច្រើនពីការបោះឆ្នោត ហើយសេចក្ដីសម្រេចនេះទំនងជាមិនត្រូវបានអនុម័តទេ។

អ៊ីរ៉ង់ និងអឺរ៉ុបទាំងបីនៅសប្តាហ៍នេះ បានព្យាយាមសម្រេចកិច្ចព្រមព្រៀងចុងក្រោយ ដើម្បីពន្យារពេលការត្រឡប់មកវិញនៃទណ្ឌកម្ម និងបង្កើតឱកាសសម្រាប់ការចរចារយៈពេលវែងស្តីពីកម្មវិធីនុយក្លេអ៊ែររបស់ទីក្រុងតេអេរ៉ង់ ប៉ុន្តែកិច្ចចរចាកន្លងមកពុំទាន់មានវឌ្ឍនភាពគ្រប់គ្រាន់នៅឡើយ៕