អតីតប្រធានាធិបតីកូរ៉េខាងត្បូង លោក Yoon Suk Yeol បានបង្ហាញខ្លួនក្នុងតុលាការនៅថ្ងៃសុក្រ (២៦ កញ្ញា) នេះ ក្នុងពេលចាប់ផ្តើមកាត់ក្តីជុំថ្មីមួយ លើបទចោទរារាំងភារកិច្ចមន្រ្តី និងរំលោភអំណាចទាក់ទងនឹងវិបត្តិច្បាប់អាជ្ញាសឹកកាលពីឆ្នាំមុន បន្ទាប់ពីលោកមិនទៅចូលរួមក្នុងការកាត់ក្តីដាច់ដោយឡែកមួយផ្សេងអស់ជាច្រើនសប្តាហ៍លើបទចោទបះបោរ។

លោក Yoon វ័យ ៦៤ឆ្នាំ ហាក់ដូចជាស្គមស្គាំងជាងមុនគួរឱ្យកត់សម្គាល់ ហើយសក់របស់លោកប្រែជាស្កូវ និងកាត់ខ្លី បន្ទាប់ពីបានចេញពីពន្ធនាគារអស់ជាង ២ខែ ហើយលោកបានបដិសេធមិនចូលរួមសវនាការចាប់តាំងពីដើមខែកក្កដាមក ដោយលើកឡើងពីហេតុផលសុខភាព។

អតីតប្រធានាធិបតីអភិរក្សនិយមរូបនេះ ប្រឈមនឹងបទចោទថ្មីៗជាច្រើន រួមទាំងការរារាំងភារកិច្ចមន្រ្តី ដែលផ្តើមចេញពីការប៉ុនប៉ងរារាំងក្រុមអ្នកស៊ើបអង្កេតមិនឱ្យចាប់ខ្លួនលោកកាលពីខែមករា ហើយលោកបានសម្ងំនៅខាងក្នុងបរិវេណវិមានប្រធានាធិបតី ចំណែកបទរំលោភអំណាចបានចោទលោក Yoon ថាបំពានសិទ្ធិសមាជិកគណៈរដ្ឋមន្ត្រីអំឡុងពេលប្រកាសច្បាប់អាជ្ញាសឹក។

ការចោទប្រកាន់ថ្មីនេះបានដាក់ទៅតុលាការដោយរដ្ឋអាជ្ញាពិសេស ដែលត្រូវតែងតាំងកាលពីខែមិថុនា ហើយក្រុមផ្លូវច្បាប់របស់ពួកគេបានពង្រីកការស៊ើបអង្កេតលើលោក Yoon និងអតីតមន្ត្រីរដ្ឋាភិបាល និងយោធាមួយចំនួន។ បទចោទថ្មីនេះមានទោសដាក់ពន្ធនាគារលើសពី ៣ឆ្នាំលើសាលក្រមមានទោស។ លោក Yoon កំពុងប្រឈមការកាត់ទោសប្រហារជីវិត ឬជាប់ពន្ធនាគារអស់មួយជីវិតរួចទៅហើយ ប្រសិនបើរកឃើញថាមានកំហុសលើបទបះបោរ។

លោក Yoon បានបដិសេធរាល់បទចោទទាំងឡាយ ហើយអះអាងថា លោកមានអំណាចក្នុងនាមជាប្រធានាធិបតីនៅពេលនោះ ក្នុងការប្រកាសច្បាប់អាជ្ញាសឹកកាលពីក្នុងខែធ្នូ។ លោកក៏ច្រានចោលរាល់ការស៊ើបអង្កេតប្រឆាំងនឹងលោកថាមានហេតុផលនយោបាយ៕