ប្រធានាធិបតីកូរ៉េខាងត្បូង លោក Lee Jae Myung បាននិយាយកាលពីថ្ងៃព្រហស្បតិ៍ (២៥ កញ្ញា) ថា កូរ៉េខាងជើង កំពុងស្ថិតក្នុងដំណាក់កាលចុងក្រោយនៃការអភិវឌ្ឍមីស៊ីលបាលីស្ទិកអន្តរទ្វីប (ICBM) ដែលអាចដឹកអាវុធនុយក្លេអ៊ែរទៅវាយប្រហារដល់សហរដ្ឋអាមេរិក បើទោះបីជាទីក្រុងព្យុងយ៉ាងមិនទាន់មានជំនាញខាងបច្ចេកវិទ្យាបញ្ជូនក្បាលគ្រាប់ត្រឡប់ពីទីអវកាសក៏ដោយ។

លោក Lee ដែលកំពុងនៅទីក្រុងញូវយ៉កសម្រាប់មហាសន្និបាតអង្គការសហប្រជាជាតិ UNGA បានរៀបចំសម័យប្រជុំទំនាក់ទំនងវិនិយោគិនមួយ ហើយបានសន្យាប្រាប់ក្រុមធុរកិច្ចទាំងនោះថា លោកនឹងកាត់បន្ថយហានិភ័យផ្នែកសន្តិសុខដែលមានទំនាក់ទំនងជាមួយកូរ៉េខាងជើង ដើម្បីទាក់ទាញការវិនិយោគបន្ថែមទៀត និងជំរុញសេដ្ឋកិច្ច។

ក្នុងកិច្ចប្រជុំនោះ លោក Lee បាននិយាយថា "មិនថាសម្រាប់ការចរចាជាមួយអាមេរិក ឬសម្រាប់របបផ្ទាល់ខ្លួនទេ ពេលនេះ កូរ៉េខាងជើងកំពុងបន្តអភិវឌ្ឍមីស៊ីលបាលីស្ទិកអន្តរទ្វីប ដែលមានសមត្ថភាពទៅដល់អាមេរិក ដោយផ្ទុកក្បាលគ្រាប់នុយក្លេអ៊ែរ និងទម្លាក់គ្រាប់បែកលើអាមេរិក"។

លោកបន្តថា "ពួកគេហាក់មិនទាន់ជោគជ័យនៅឡើយទេ ប៉ុន្តែកំពុងស្ថិតក្នុងដំណាក់កាលចុងក្រោយហើយ នៅសល់តែអ្វីដែលហៅថា បច្ចេកវិទ្យាបញ្ជូនក្បាលគ្រាប់ត្រឡប់ពីទីអវកាសវិញប៉ុណ្ណោះ"។

គួររម្លឹកថា កាលឆ្នាំ២០២៤ កូរ៉េខាងជើងបានបាញ់មីស៊ីលបាលីស្ទិកអន្តរទ្វីបដ៏ធំបំផុតរបស់ខ្លួនឈ្មោះ Hwasong-19 ដែលហោះចូលជ្រៅក្នុងលំហ។ ក្រុមអ្នកជំនាញនិយាយថា មីស៊ីលបែបនេះមានសមត្ថភាពវាយប្រហារគ្រប់គោលដៅនៅអាមេរិក ប៉ុន្តែសមត្ថភាពរបស់កូរ៉េខាងជើង ក្នុងការដឹកនាំមីស៊ីល និងការពារក្បាលគ្រាប់ពេលបញ្ជូនពីទីអវកាសវិញ នៅតែស្ថិតក្នុងការសង្ស័យនៅឡើយ៕