តាមរយៈការបង្ហោះ នៅលើគេហទំព័របណ្ដាញសង្គម X ដោយដកស្រង់សម្តីមន្ត្រីជាន់ខ្ពស់អាមេរិកម្នាក់ អ្នកសារព័ត៌មានរបស់ទីបណ្ដាញសារព័ត៌មាន Axios គឺលោក Barak Ravid បានបញ្ជាក់ថា សហរដ្ឋអាមេរិក និងអ៊ីស្រាអែល ជិតឈានដល់កិច្ចព្រមព្រៀងមួយហើយ ស្តីពីផែនការរបស់លោកប្រធានាធិបតី Donald Trump ក្នុងការបញ្ចប់សង្រ្គាម នៅតំបន់ហ្កាហ្សា។

លោក Ravid បាននិយាយថា ការពិភាក្សាត្រូវបានធ្វើឡើង រវាងបេសកជនពិសេស លោក Steve Witkoff លោក Jared Kushner កូនប្រសាររបស់លោក Trump និងនាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃអាទិត្យ (ទី២៨ ខែកញ្ញា)។

មន្ត្រី ដែលរូបលោកបានដកស្រង់សម្ដី បានបន្ថែមថា តែក្រុមហាម៉ាស នៅតែត្រូវការផ្ដល់ការយល់ព្រម។ តែយ៉ាងណាក្ដី សារព័ត៌មានរ៉យទ័រ មិនអាចផ្ទៀងផ្ទាត់របាយការណ៍នេះបានភ្លាមៗនោះឡើយ។

គួរបញ្ជាក់ថា នៅព្រឹកថ្ងៃដដែលនោះ លោក Trump បាននិយាយថា លោកសង្ឃឹមថា នឹងបញ្ចប់សព្វគ្រប់នូវសំណើផែនការសន្តិភាព នៅតំបន់ហ្កាហ្សា អំឡុងកិច្ចប្រជុំមួយ នាថ្ងៃចន្ទ (ទី២៩ ខែកញ្ញា) ជាមួយលោក Netanyahu៕