ភ្នំពេញ៖ ក្រៅពីផ្ញើសារអបអរសាទរពិធីចូលឆ្នាំថ្មីប្រពៃណីចិន និងវៀតណាម តាមហ្វេសប៊ុកផ្ទាល់នៅថ្ងៃទី៣១ ខែមករា ឆ្នាំ២០២២ សម្តេចអគ្គមហាពញាចក្រី ហេង សំរិន ប្រធានរដ្ឋសភា ក៏បានផ្ញើសារចូលរួមអបអរសាទរជាមួយបងប្អូនដែលមានសែស្រឡាយកាត់ចិន និងវៀតណាម នៅក្នុងឱកាសចូលឆ្នាំថ្មីប្រពៃ ណីចិន និងវៀតណាមនៅពេលនេះផងដែរ។

ប្រភពដដែលបន្តថា សេរីភាពខាងជំនឿ សាសនា ត្រូវបានធានាដោយច្បាប់។ ភាពសុខដុមខាងជាតិសាសន៍ ជំនឿ សាសនា នៅកម្ពុជា បានផ្តល់លទ្ធភាពឱ្យយើងបានកសាងអភិវឌ្ឍន៍ប្រទេសជាតិបានរីកចម្រើន ហើយប្រជាពលរដ្ឋរស់នៅប្រកបដោយសេចក្តីសុខដូចជាសព្វថ្ងៃ ចេះគោរពគ្នាទៅវិញទៅមក ទោះបីមានជំនឿ មានសាសនាផ្សេងគ្នាយ៉ាងណាក្តី។

សម្ដេច ហេង សំរិន ក៏បានអំពាវនាវដល់ប្រជាពលរដ្ឋទាំងអស់ប្រុងប្រយ័ត្ន ចំពោះភ្លើងទៀនធូបក្នុងពេ លសែនព្រេននេះឱ្យបានខ្ពស់បំផុត ចៀសវាងគ្រោះអគ្គិភ័យដែលអាចកើតមានឡើងជាយថាហេតុ។

សម្ដេចក៏បានជូនពរដល់ប្រជាពលរដ្ឋទាំងអស់សូមបានប្រកបតែសេចក្តីសុខ សេចក្តីចម្រើន ធ្វើដំណើ រកម្សាន្តគ្រប់ទីកន្លែង មានអធ្យាស្រ័យគ្នាល្អ គោរពច្បាប់ចរាចរណ៍គ្រប់ៗគ្នា។ ពិសេសកុំភ្លេចអនុវត្តវិធា នការសុខាភិបាលការពារជំងឺកូវីដ-១៩ ឱ្យបានហ្មត់ចត់ មិនត្រូវធ្វេសប្រហែសឡើយ។

សម្ដេចប្រធានរដ្ឋសភាក៏បានជូនពរដល់បងប្អូនជនជាតិចិន និងវៀតណាមទាំងអស់ ដែលកំពុងរស់នៅវិនិយោគ ប្រកបកិច្ចការនានានៅកម្ពុជា សូមជួបតែសេចក្ដីសុខចម្រុងចម្រើន និងទទួលបានលាភសំណាងគ្រប់ៗគ្នា ក្នុងឱកាសចូលឆ្នាំថ្មីប្រពៃណីនេះ៕ ដោយ៖ គង់ ឌិន