រដ្ឋាភិបាលវៀតណាម បាននិយាយនៅថ្ងៃអង្គារ (៣០ កញ្ញា) នេះថា ចំនួនអ្នកស្លាប់ដោយសារខ្យល់ព្យុះទីហ្វុង Bualoi នៅប្រទេសនេះ បានកើនឡើងដល់ ១៩នាក់ ហើយមនុស្ស ២១នាក់ ផ្សេងទៀតនៅតែបាត់ខ្លួន ដោយធ្វើឱ្យគ្រោះធម្មជាតិនេះក្លាយជាព្យុះបំផ្លិចបំផ្លាញបំផុត ដែលវាយប្រហារវៀតណាមក្នុងឆ្នាំនេះ ខណៈភ្លៀងធ្លាក់ខ្លាំងបានបង្កើនហានិភ័យនៃទឹកជំនន់ និងបំណាក់ដីនៅតំបន់ភាគខាងជើង។

ព្យុះ Bualoi បានវាយបោកដល់ដីគោកកាលពីថ្ងៃចន្ទ នៅភាគខាងជើងប៉ែកកណ្តាលនៃប្រទេសវៀតណាម ដោយនាំមកនូវរលកសមុទ្រធំៗ ខ្យល់បក់ខ្លាំងក្លា និងភ្លៀងធ្លាក់យ៉ាងគំហុក។ កាលពីសប្តាហ៍មុន ព្យុះទីហ្វុងនេះបានសម្លាប់មនុស្សជាច្រើននាក់រួចមកហើយនៅហ្វីលីពីន។

រដ្ឋាភិបាលវៀតណាមនិយាយថា មនុស្ស ៨៨នាក់ បានរងរបួស លំនៅឋានជាង ១០ម៉ឺនខ្នង រងការខូចខាត ដែលភាគច្រើននៅក្នុងខេត្ត Nghe An និង Ha Tinh ហើយស្រូវ និងដំណាំផ្សេងទៀតជាង ១ម៉ឺនហិកតា ត្រូវជន់លិច។ ប្រព័ន្ធផ្សព្វផ្សាយរដ្ឋរាយការណ៍ថា គិតត្រឹមថ្ងៃអង្គារ ភូមិជាច្រើននៅភាគខាងជើងបែកកណ្តាលប្រទេស នៅតែជន់លិច ដោយមិនមានចរាចរណ៍ ឬថាមពលអគ្គិសនីឡើយ។

ទីភ្នាក់ងារអាកាសធាតុជាតិនិយាយថា ភ្លៀងធ្លាក់នៅតំបន់ជាច្រើននៃប្រទេសវៀតណាម មានលើសពី ៣០០មីលីម៉ែត្រ ក្នុងពេល ២៤ម៉ោងកន្លងទៅនោះ ហើយភ្លៀងធ្លាក់ខ្លាំងនឹងបន្ត រួមទាំងនៅរដ្ឋធានីហាណូយ រួមទាំងខ្យល់បក់ខ្លាំង និងផ្លេកបន្ទោរក៏អាចកើតមានផងដែរ៕