លោកប្រធានាធិបតីសហរដ្ឋអាមេរិក Donald Trump បានស្នើផែនការសន្តិភាពចំនួន២០ចំណុច ដើម្បីបញ្ចប់សង្រ្គាមនៅតំបន់ហ្កាហ្សា បន្ទាប់ពីបានជួបពិភាក្សាជាមួយនាយករដ្ឋមន្ត្រីអ៊ីស្រាអែល Benjamin Netanyahu ដែលបានស្វាគមន៍ចំពោះសំណើនេះ។

សំណើថ្មីដែលអំពាវនាវឱ្យមានការរំសាយអាវុធរបស់ក្រុមហាម៉ាស ត្រូវបានស្វាគមន៍ដោយអាជ្ញាធរប៉ាឡេស្ទីនដែលគ្រប់គ្រងនៅតំបន់ West Bank រួមជាមួយនឹងប្រទេសអារ៉ាប់ក្នុងតំបន់មួយចំនួន។

ក្រុម ហាម៉ាស និយាយថា ខ្លួនកំពុងសិក្សាសំណើរបស់សហរដ្ឋអាមេរិកដោយស្មោះត្រង់ ខណៈក្រុមជីហាតអ៊ីស្លាមប៉ាឡេស្ទីន (PIJ) និយាយថា ផែនការនេះគឺជា រូបមន្តដើម្បីកម្ទេចតំបន់នេះចោល។

អាជ្ញាធរប៉ាឡេស្ទីន បាននិយាយថា ខ្លួនស្វាគមន៍ចំពោះ កិច្ចខិតខំប្រឹងប្រែងដោយស្មោះ និងគ្មានការនឿយហត់ ដើម្បីបញ្ចប់សង្គ្រាមនៅហ្កាហ្សា ហើយបញ្ជាក់ទំនុកចិត្តរបស់ខ្លួនលើសមត្ថភាពរបស់អាមេរិក ក្នុងការស្វែងរកផ្លូវទៅកាន់សន្តិភាព។

អាជ្ញាធរប៉ាឡេស្ទីនបាននិយាយក្នុងសេចក្ដីថ្លែងការណ៍ចេញផ្សាយដោយទីភ្នាក់ងារសារព័ត៌មាន afa របស់ប៉ាឡេស្ទីនថា ខ្លួនបញ្ជាក់ឡើងវិញនូវការប្តេជ្ញាចិត្តរួមគ្នារបស់ខ្លួនក្នុងការធ្វើការជាមួយសហរដ្ឋអាមេរិក បណ្តាប្រទេសក្នុងតំបន់ និងដៃគូដើម្បីបញ្ចប់សង្រ្គាមនៅហ្កាហ្សា តាមរយៈកិច្ចព្រមព្រៀងដ៏ទូលំទូលាយដែលធានាដល់ការផ្តល់ជំនួយមនុស្សធម៌គ្រប់គ្រាន់ដល់ហ្កាហ្សា ការដោះលែងចំណាប់ខ្មាំង និងអ្នកទោស ។

រដ្ឋមន្ត្រីការបរទេសនៃប្រទេសអេហ្ស៊ីប ឥណ្ឌូណេស៊ី ហ្ស៊កដានី ប៉ាគីស្ថាន កាតា អារ៉ាប៊ីសាអ៊ូឌីត និងទួរគី បានចេញសេចក្តីថ្លែងការណ៍រួមមួយដោយស្វាគមន៍ចំពោះ កិច្ចខិតខំប្រឹងប្រែងដោយស្មោះស្ម័គ្ររបស់លោក Trump ដើម្បីបញ្ចប់សង្គ្រាមនៅហ្កាហ្សា ហើយអះអាងនូវទំនុកចិត្តរបស់ពួកគេលើសមត្ថភាពរបស់លោក Trump ក្នុងការស្វែងរកផ្លូវទៅកាន់សន្តិភាព៕