ប្រទេសចំនួនបួនរបស់សម្ព័ន្ធយោធាណាតូនិងសហភាពអឺរ៉ុប ដែលមានព្រំប្រទល់ជាប់ជាមួយប្រទេសរុស្ស៊ីមានផែនការសាងសង់លេណដ្ឋានបេតុង និងសំណាញ់ប្រឆាំងយានដ្រូននៅឯរោងចក្រថាមពលសំខាន់ៗក្រោមផែនការការពារបណ្តាញថាមពលរបស់ខ្លួនបន្ទាប់ពីការលុកលុយដោយយានដ្រូនរបស់រុស្ស៊ីកាលពីពេលថ្មីៗនេះ។ ការរំលោភលើដែនអាកាសរបស់ប្រទេសប៉ូឡូញដោយយានដ្រូនរបស់រុស្ស៊ីក្នុងខែនេះ និងការមើលឃើញយានដ្រូនជាច្រើនគ្រឿងរួមទាំងមួយគ្រឿងដែលបានបង្ខំឱ្យបិទអាកាសយានដ្ឋាន Copenhagen រយៈពេលជាច្រើនម៉ោង បានបង្កើនការព្រួយបារម្ភអំពីការការពាររបស់ណាតូនៅស្លាបខាងកើតរបស់ខ្លួន។ ការបំពានដែនអាកាស ក៏បានបង្កើនការព្រួយបារម្ភអំពីភាពងាយរងគ្រោះនៃរោងចក្រថាមពលនៅក្នុងតំបន់ ហើយប្រទេសប៉ូឡូញ លីទុយអានី អេស្តូនី និងប្រទេសឡាតវី បានរៀបចំផែនការដើម្បីការពារបណ្តាញអគ្គិសនីរបស់ខ្លួន ដែលបច្ចុប្បន្ននេះពួកគេចាត់ទុកថាជាបញ្ហាបន្ទាន់។ នៅក្នុងបទសម្ភាសន៍ជាមួយសារព័ត៌មាន ប្រតិបត្តិករបណ្តាញអគ្គិសនីប្រទេសប៉ូឡូញ និងលីទុយអានី បានផ្តល់ព័ត៌មានលម្អិតដែលពុំបានបង្ហាញផែនការកាលពីពេលមុន រួមមានទាំងការសាងសង់លេណដ្ឋានដល់ស្ថានីយចែកចាយបន្តឬផ្នែកសំខាន់ៗនៃស្ថានីយចែកចាយបន្ត ការប្រើប្រាស់សំណាញ់ប្រឆាំងយានដ្រូន ដើម្បីគ្របដណ្តប់ហេដ្ឋារចនាសម្ព័ន្ធសំខាន់ៗ និងការស្តុកទុកនូវសមាសធាតុដែលពិបាកនឹងជំនួស។ ប៉ុន្មានថ្ងៃបន្ទាប់ពីយានដ្រូនរបស់រុស្ស៊ីត្រូវបានបាញ់ទម្លាក់ក្នុងដែនអាកាសប៉ូឡូញដោយយន្តហោះរបស់ណាតូ ប្រទេសប៉ូឡូញនិងរដ្ឋបាល់ទិកទាំងបី បានបញ្ជូនបណ្តាញផែនការសន្តិសុខមានតម្លៃ៣៨២លានអឺរ៉ូ (៤៤៧លានដុល្លារ) ទៅកាន់សហភាពអឺរ៉ុប ហើយបានស្នើសុំឱ្យផ្តល់ហិរញ្ញប្បទានចំនួនពាក់កណ្តាលនៃចំនួននេះ។