បាល់ទាត់៖ លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា នឹងចូលរួមដឹកនាំក្រុមជម្រើសជាតិអាយុក្រោម ២៣ឆ្នាំកម្ពុជា នៅក្នុងយុទ្ធនាការប្រកួតបាល់ទាត់ជើងឯកអាស៊ីអាគ្នេយ៍អាយុក្រោម ២៣ឆ្នាំ AFF U23 Championship 2022 នៅកម្ពុជាចាប់ពីថ្ងៃទី១៤ ដល់ថ្ងៃទី១៦ ខែកុម្ភៈ ឆ្នាំ២០២២ ឆាប់ៗខាងមុខនេះ។ នេះបើតាមការបញ្ជាក់របស់មន្ដ្រីសហព័ន្ធកីឡាបាល់ទាត់កម្ពុជា។
ក្នុងនាមម្ចាស់ផ្ទះ កម្ពុជាទើបបង្ហាញបញ្ជីឈ្មោះបឋមរបស់ក្រុមគោព្រៃជំទង់កាលពីម្សិលមិញ ដែលមានសមាជិកសរុប ៧៤នាក់ដើម្បីប្រមូលផ្ដុំហ្វឹកហាត់តេស្ដដំណាក់កាលទី១ ចាប់ពីថ្ងៃទី០២ ដល់ថ្ងៃទី០៤ ខាងមុខដើម្បីចម្រាញ់កីឡាករឆ្នើមៗត្រៀមស្វាគមន៍ក្រុមភ្ញៀវក្នុងការប្រកួតពានរង្វាន់ប្រចាំតំបន់នេះ។ គួរដឹងថា ពានរង្វាន់ AFF U23 Championship 2022 នៅរាជធានីភ្នំពេញនឹងចាប់ផ្ដើមការប្រកួតនាពាក់កណ្ដាលខែនេះនឹងប្រើប្រាស់ទីលានចំនួន ២ សម្រាប់ធ្វើការប្រកួតរួមមានពហុកីឡដ្ឋានជាតិមរតកតេជោ និងកីឡដ្ឋានព្រីនស៍ ខណៈព្រឹត្តិការណ៍ប្រចាំតំបន់នេះទទួលបានសិទ្ធផ្សាយផ្ទាលផ្ដាច់មុខដោយស្ថានីយ៍ទូរទស្សន៍ BTV-News។ សម្រាប់ការប្រកួតនេះដែរគឺមាន ១១ប្រទេសចូលរួម និងបែងចែកជា ៣ពូលដោយក្រុមគោព្រៃជំទង់កម្ពុជាស្ថិតក្នុងពូល A ជាមួយទីម័រខាងកើត ហ្វីលីពីន និងព្រុយណេ។ រីឯពូល B មានឥណ្ឌូនេស៊ី ម៉ាឡេស៊ី មីយ៉ាន់ម៉ា និងឡាវ ខណៈពូល C មានថៃ វៀតណាម និងសិង្ហបុរី៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
