ប្រធានាធិបតីទួរគី លោក Tayyip Erdogan នៅថ្ងៃអង្គារ (ទី៣០ ខែកញ្ញា) នេះ បានពោលសរសើរដល់ «កិច្ចប្រឹងប្រែង និងភាពជាអ្នកដឹកនាំ» របស់លោក Donald Trump ដែលស្វះស្វែងបញ្ចប់សង្រ្គាម នៅតំបន់ហ្កាហ្សា បន្ទាប់ពីមេដឹកនាំសហរដ្ឋអាមេរិកបានធានាឲ្យមានការគាំទ្រពីនាយករដ្ឋមន្ត្រីអ៊ីស្រាអែល លោក Benjamin Netanyahu សម្រាប់សំណើសន្តិភាពដែលគាំទ្រដោយសហរដ្ឋអាមេរិក។

បន្ទាប់ពីមានកិច្ចពិភាក្សា រវាងលោក Trump និងលោក Netanyahu នៅទីក្រុងវ៉ាស៊ីនតោន សេតវិមានបានចេញផ្សាយផែនការចំនួន ២០ចំណុច ដែលនឹងឃើញមានបទឈប់បាញ់ភ្លាមៗ ការដោះដូរចំណាប់ថ្នូរដែលត្រូវបានឃុំខ្លួនដោយក្រុមហាម៉ាស ជាមួយអ្នកទោសប៉ាឡេស្ទីនដែលជាប់ឃុំនៅអ៊ីស្រាអែល ការដកទ័ពអ៊ីស្រាអែលចេញពីតំបន់ហ្កាហ្សា ការរំសាយអាវុធរបស់ក្រុមហាម៉ាស និងរដ្ឋាភិបាលអន្តរកាលដឹកនាំដោយស្ថាប័នអន្តរជាតិមួយ។ តែយ៉ាងណាក្ដី គេមិនទាន់ច្បាស់ទេថា តើក្រុមហាម៉ាសនឹងទទួលយកកិច្ចព្រមព្រៀងនេះដែរ ឬយ៉ាងណា។

លោក Erdogan ដែលបានជួបលោក Trump នៅសេតវិមានជាលើកដំបូង ក្នុងរយៈពេល ៦ឆ្នាំកាលពីសប្តាហ៍មុន បាននិយាយថា៖ «ខ្ញុំសូមសរសើរដល់កិច្ចប្រឹងប្រែង និងភាពជាអ្នកដឹកនាំរបស់លោកប្រធានាធិបតីអាមេរិក Donald Trump ដែលធ្វើឡើងក្នុងគោលបំណងបញ្ឈប់ការបង្ហូរឈាម នៅតំបន់ហ្កាហ្សា និងសម្រេចបានបទឈប់បាញ់»។

ហើយមេដឹកនាំទួរគីរូបនេះបានរៀបរាប់បន្ថែមនៅលើបណ្ដាញសង្គម X ថា ប្រទេសទួរគីនឹងបន្តចូលរួមចំណែកក្នុងដំណើរការនេះ `ក្នុងគោលបំណងបង្កើតសន្តិភាពដ៏យុត្តិធម៍ និងយូរអង្វែងដែលអាចទទួលយកបាន សម្រាប់គ្រប់ភាគីទាំងអស់»។

គួរបញ្ជាក់ថា ប្រទេសទួរគីគឺជាអ្នករិះគន់ដោយឥតសំចៃ ចំពោះការវាយលុករយៈពេល ២ឆ្នាំរបស់អ៊ីស្រាអែលលើតំបន់ហ្កាហ្សា ដែលប្រទេសនេះចាត់ទុកថា ជា «អំពើប្រល័យពូជសាសន៍»៕