ស្វាយរៀង ៖ ផ្លូវជាតិ ផ្លូវខេត្ត និង ផ្លូវលំជនបទក្រាលកៅស៊ូប្រភេទ DBST ក្រាលថ្មបំបែក ស្ថិតនៅក្នុងភូមិសាស្ត្រ ខេត្តស្វាយរៀង ត្រូវបានធ្វើការជួសជុលកែលម្អឡើងវិញ ក្រោយពីរងការខូចខាតដោយធម្មជាតិ និងប្រើ ប្រាស់ខុសបច្ចេកទេស ។

​លោក យន្ត រស្មី ប្រធានមន្ទីរសាធារណការ និងដឹកជញ្ជូន ខេត្តស្វាយរៀង នៅថ្ងៃ៣០ ខែកញ្ញា ឆ្នាំ២០២៥ នេះ បានប្រាប់BTVថា អនុវត្តគោលនយោបាយកែលំអរប្រពន្ធ័គមនាគមន៍ នៅឆ្នាំ២០២៤ និង ឆ្នាំ២០២៥នេះ នៅក្នុងភូមិសាស្ត្រខេត្តស្វាយរៀង តាមរយៈក្រសួងសាធារណៈការនិងដឹកជញ្ជូន មន្ទីរ បានធ្វើការជួសជុល ផ្លូវជាច្រើនខ្សែ ដាក់អោយពលរដ្ឋប្រើប្រាស់ ខណៈដែលនៅតំបន់ខ្លះរដ្ឋបាលខេត្ត ស្រុក ក្រុង បាននឹងកំពុងតែស្ថាបនាផ្លូវប្រើប្រាស់ថវិកាមូលនិធិឃុំ/សង្កាត់ប្រចាំឆ្នាំ២០២៥ផងដែរ។

ជាក់ស្តែងក្នុងរយៈពេល៩ខែ ឆ្នាំ២០២៥នេះ មន្ទីរបានធ្វើការជួសជុលផ្លូវខេត្តលេខ៣១៤ B ប្រភេទDBST បានប្រវែង១ពាន់ ៥៤៥ម៉ែត្រ ស្មើនិង៦៤% ផ្លូវខេត្តលេខ ៣១៧ A ប្រភេទល្បាយថ្ម បានប្រវែង៣ពាន់ ៧០០ម៉ែត្រ ស្មើនិង១០០% ផ្លូវខេត្តលេខ៣១៥ ប្រភេទ DBST បានប្រវែង ៣ពាន់១៥០ម៉ែត្រ ស្មើនិង៦២% ផ្លូវលេខ៣១៣១ ប្រភេទ DBST ប្រវែង២ពាន់ម៉ែត្រ ស្មើនិង៦១% និងជួសជុលផ្លូវលេខ១៣ និងផ្លូវលេខ៣១៧ ប្រភេទ ReseaI DBST បានប្រវែង១ម៉ឺន ២ពាន់ម៉ែត្រ ស្មើនិង៥៤% និងធ្វើការថែទាំជាប្រចាំក្នុងផែនការឆ្នាំ២០២៥លើផ្លូវជាតិនិងផ្លូវខេត្ត ក្រាលកៅស៊ូ និងដីល្បាយថ្ម បានប្រវែង៤សែន ៤ម៉ឺន៤ពាន់១២០ម៉ែត្រ ។

លោកបានបន្តថាក្រៅពីការងារជួសជុលផ្លូវ ក្រុមការងារបច្ចេកទេសមន្ទីរសហការជាមួយរដ្ឋបាលនៅ ក្នុងតំបន់បានចុះធ្វើការត្រួតពិនិត្យ ស្ថានភាពផ្លូវ បានចំនួន១៨ខ្សែ ប្រវែងជាង៤០០គីឡូម៉ែត្រ ដើម្បីវាយ តម្លៃ និងធ្វើផែនការគ្រោងថវិកា បន្តជួសជុលនិងស្ថាបនា នៅឆ្នាំបន្តបន្ទាប់ ៕

អត្ថបទ៖ ភា សារិត