វិទ្យាស្ថានភ្នំភ្លើង និងរញ្ជួយដីហ្វីលីពីន (Phivolcs) បាននិយាយថា គ្រោះរញ្ជួយដីកម្រិត ៦,៩រ៉ិចទ័រ បានវាយប្រហារតំបន់ឆ្នេរនៃខេត្តសេប៊ូ កាលពីយប់ថ្ងៃអង្គារ ដោយបានសម្លាប់មនុស្សរាប់សិបនាក់ហើយមកទល់ថ្ងៃពុធ (១ តុលា) នេះ។ កម្រិតរញ្ជួយ ដំបូងឡើយត្រូវបានកត់ត្រានៅ ៦,៧រ៉ិចទ័រ ប៉ុន្តែក្រោយមកត្រូវបានដំឡើងទៅតួលេខ ៦,៩ រ៉ិចទ័រ។

វិទ្យាស្ថាន Phivolcs និយាយថា គ្រោះរញ្ជួយដីនេះវាយប្រហារនៅជម្រៅ ៥គីឡូម៉ែត្រ ចម្ងាយប្រហែល ២១គីឡូម៉ែត្រភាគឦសាននៃទីក្រុង Bogo របស់ខេត្តសេប៊ូ នៅម៉ោងក្នុងស្រុក ៩:៥៩នាទីយប់។ ការិយាល័យព័ត៌មានខេត្ត បានឱ្យដឹងថា គិតត្រឹមម៉ោងក្នុងស្រុក ៧:៣០ នាទីព្រឹក ចំនួនអ្នកស្លាប់នៅទីក្រុង Bogo មាន ២៧នាក់ហើយ ខណៈមនុស្ស ៥នាក់ទៀត ត្រូវរាយការណ៍ថាបានស្លាប់នៅក្រុង San Remigio មុននេះ ដែលនាំឱ្យតួលេខស្លាប់សរុបឡើងលើសពី ៣០នាក់។

មជ្ឈមណ្ឌលព័ត៌មានខេត្តសេប៊ូ បាននិយាយនៅថ្ងៃពុធនេះថា មានមនុស្សជិត ៤០នាក់ ត្រូវរាយការណ៍ថាបានរងរបួសរហូតមកដល់ពេលនេះ។ ទីភ្នាក់ងាររញ្ជួយដីហ្វីលីពីន Phivolcs បានព្រមានពីរញ្ជួយជាបន្តបន្ទាប់ និងការខូចខាតនៅតាមតំបន់ឆ្នេរសមុទ្រ ហើយក៏បានព្រមានថា "ចរន្តទឹកខ្លាំង និងការប្រែប្រួលយ៉ាងឆាប់រហ័សនៃកម្រិតទឹកសមុទ្រ ត្រូវបានរំពឹងទុក"។

សាលាក្រុង San Remigio ក្នុងតំបន់ បានប្រកាស "ស្ថានភាពគ្រោះមហន្តរាយ" ដោយសារអ្វីដែលខ្លួនពិពណ៌នាថាជា "ការខូចខាត និងការរំខានយ៉ាងទូលំទូលាយ"៕