ក្រុមហ៊ួទីគាំទ្រដោយអ៊ីរ៉ង់នៅប្រទេសយេម៉ែនកាលពីថ្ងៃអង្គារ បានគំរាមកំហែងកំណត់គោលដៅលើក្រុមហ៊ុនប្រេងធំៗរបស់សហរដ្ឋអាមេរិក រួមមានទាំងក្រុមហ៊ុន Exxon Mobil និងក្រុមហ៊ុន Chevron ទោះបីជាមានបទឈប់បាញ់ជាមួយទីក្រុងវ៉ាស៊ីនតោន មិនឱ្យវាយប្រហារលើនាវាជាប់ពាក់ព័ន្ធជាមួយសហរដ្ឋអាមេរិកនៅក្នុងសមុទ្រក្រហម និងឈូងសមុទ្រ Aden ក៏ដោយ។ មជ្ឈមណ្ឌលសម្របសម្រួលប្រតិបត្តិការមនុស្សធម៌របស់ក្រុមហ៊ួទីដែលមានទំនាក់ទំនងជាមួយប្រតិបត្តិករដឹកជញ្ជូនតាមនាវា បានប្រកាសដាក់ទណ្ឌកម្មលើក្រុមហ៊ុនអាមេរិកចំនួន១៣ក្រុមហ៊ុន លើនាយកប្រតិបត្តិចំនួន៩រូប និងនាវាចំនួនពីរគ្រឿង ដោយប្រកាសថាពួកគេជា «អង្គភាពអរិភាព» បើកការវាយប្រហារ។ ចំណាត់ការនេះ បានបង្កើនការព្រួយបារម្ភនៃការរំខានជាថ្មីដល់សន្តិសុខដែនសមុទ្រនៅក្នុងតំបន់ ដែលក្រុមហ៊ួទី ធ្លាប់បានបើកការវាយប្រហារដោយយានដ្រូននិងមីស៊ីលលើនាវាពាណិជ្ជកម្ម។ បញ្ជីទណ្ឌកម្ម រួមមានក្រុមហ៊ុន Exxon Mobil, Chevron និងក្រុមហ៊ុន ConocoPhillips ។ មជ្ឈមណ្ឌលសម្របសម្រួលប្រតិបត្តិការមនុស្សធម៌របស់ក្រុមហ៊ួទី បាននិយាយនៅលើគេហទំព័ររបស់ខ្លួនថាអង្គភាពដែលត្រូវបានកំណត់ដោយក្រុមហ៊ូទី« នឹងត្រូវបានដោះស្រាយស្របជាមួយនឹងគោលការណ៍នៃការប្រឈមមុខដាក់គ្នា»។ អ្នកវិភាគឯករាជ្យ លោក Mohammed Albasha បាននិយាយថា វានៅតែមិនច្បាស់លាស់ថាតើការប្រកាសនេះបង្ហាញសញ្ញានៃការវាយប្រហារដែលជិតមកដល់ឬយ៉ាងណា ដោយព្រមានថាការវាយប្រហារណាមួយនឹងរំលោភលើបទឈប់បាញ់ដែលសម្របសម្រួលដោយប្រទេសអូម៉ង់កាលពីខែឧសភា។ ចាប់តាំងពីឆ្នាំ២០២៣ មក ក្រុមហ៊ូទី បានកំណត់គោលដៅដដែលៗលើនាវា ដែលពួកគេចាត់ទុកថាមានទំនាក់ទំនងជាមួយអ៊ីស្រាអែល ជាអ្វីដែលពួកគេនិយាយថា ជាការគាំទ្រសម្រាប់ពលរដ្ឋប៉ាឡេស្ទីននៅក្នុងតំបន់ហ្កាហ្សា។