សេវាសង្គ្រោះបន្ទាន់របស់រដ្ឋ បាននិយាយនៅថ្ងៃពុធ (១ តុលា) នេះថា ក្រុមអ្នកជួយសង្គ្រោះបានធ្វើការពេញមួយយប់ ដើម្បីទប់ទល់នឹងការបំផ្លិចបំផ្លាញពីបញ្ហាអាកាសធាតុធ្ងន់ធ្ងរ និងទឹកជំនន់នៅក្នុងទីក្រុងកំពង់ផែ Odesa ភាគខាងត្បូងប្រទេសអ៊ុយក្រែន និងតំបន់លំនៅឋានជុំវិញនោះ ដែលបានសម្លាប់មនុស្សយ៉ាងតិច ៩នាក់ ដោយមានកុមារម្នាក់ក្នុងចំណោមអ្នកស្លាប់។

សេវាសង្គ្រោះបន្ទាន់អ៊ុយក្រែន បាននិយាយនៅលើកម្មវិធីផ្ញើសារតេលេក្រាមថា ក្រុមសង្រ្គោះបានជួយជម្លៀសមនុស្សចេញពីទឹកជំនន់ ជួយទាញរថយន្ត បូមទឹកចេញពីអគារ និងតាមរកក្មេងបាត់ខ្លួន។ ទីភ្នាក់ងារនេះក៏បានបង្ហោះរូបភាពអ្នកដំណើរសរុបជិត ៤០០នាក់ ចុះពីលើរថយន្តក្រុង ដែលជម្លៀសចេញពីទឹកជំនន់ និងការខូចខាតមួយចំនួន។

នៅថ្ងៃអង្គារ ទី៣០ ខែកញ្ញា តំបន់មួយចំនួនក្នុងប្រទេសអ៊ុយក្រែន បានរងការវាយប្រហារដោយភ្លៀងធ្លាក់ខ្លាំង និងខ្យល់បោកបក់។ ប្រព័ន្ធផ្សព្វផ្សាយរាយការណ៍ថា កម្រិតទឹកភ្លៀងធ្លាក់ជិត ២ខែ បានធ្លាក់ក្នុងពេលត្រឹមតែ ៧ម៉ោងប៉ុណ្ណោះ នៅទីក្រុង Odesa ខណៈបំពង់បង្ហូរ និងលូមិនអាចទប់ទល់នឹងលំហូរទឹកយ៉ាងគំហុកបែបនេះបានទេ ទើបបណ្ដាលឱ្យមានការជន់លិចយ៉ាងទូលំទូលាយ៕