ការស្ទង់មតិឯកជនបានបង្ហាញនៅថ្ងៃពុធ (១ តុលា) នេះថា សកម្មភាពរោងចក្របានធ្លាក់ចុះយ៉ាងខ្លាំងក្នុងសេដ្ឋកិច្ចសំខាន់ៗរបស់តំបន់អាស៊ីភាគច្រើន នៅខែកញ្ញា កន្លងទៅ ដែលក៏ជាសញ្ញានៃការធ្លាក់ចុះក្នុងកំណើនរបស់សហរដ្ឋអាមេរិក និងផលប៉ះពាល់ដែលបានរំពឹងទុកពីពន្ធគយយ៉ាងទូលំទូលាយរបស់លោកប្រធានាធិបតី Donald Trump បូកបន្ថែមទៅនឹងសម្ពាធពីតម្រូវការទន់ខ្សោយរបស់ចិន។

ភាពតានតឹងលើក្រុមហ៊ុនផលិត ក្លាយជាបញ្ហាប្រឈមដ៏ធំដែលអ្នកបង្កើតគោលនយោបាយអាស៊ី ត្រូវជួបប្រទះ ដើម្បីការការពារតំបន់ដែលពឹងផ្អែកលើការនាំចេញមួយនេះ ពីការយកពន្ធខ្ពស់របស់សហរដ្ឋអាមេរិក ដែលជាគោលនយោបាយសំខាន់របស់រដ្ឋបាលលោក Trump។

សន្ទស្សន៍ការបញ្ចាទិញ PMI របស់ស្ថាប័នស្រាវជ្រាវទីផ្សារ S&P Global បានបង្ហាញថា សកម្មភាពរោងចក្រនៅជប៉ុន ធ្លាក់ចុះដល់ ៤៨,៥ពិន្ទុ ក្នុងខែកញ្ញា ពីតួលេខ ៤៩,៧ ក្នុងខែសីហា ដោយបន្តស្ថិតនៅក្រោមកម្រិត ៥០.០ ដែលត្រូវការសម្រាប់កំណើនថេរ។ PMI របស់កោះតៃវ៉ាន់ ធ្លាក់ដល់ ៤៦,៨ កាលពីខែកញ្ញា ពីតួលេខ ៤៧,៤ ក្នុងខែសីហា ហើយការស្ទង់មតិនេះក៏បានបង្ហាញពីសកម្មភាពរោងចក្រ ធ្លាក់ចុះនៅហ្វីលីពីន ម៉ាឡេស៊ី និងកន្លែងផ្សេងទៀតផងដែរ។

គួរឱ្យបារម្ភជាងនេះទៅទៀតនោះគឺ PMI របស់ចិន ដែលជាក្បាលម៉ាស៊ីនសំខាន់នៃសេដ្ឋកិច្ចពិភពលោក កំពុងស្ថិតក្នុងភាពស្រពិចស្រពិល។ ទិន្នន័យផ្លូវការកាលពីថ្ងៃចន្ទ បានបង្ហាញថា សន្ទស្សន៍ PMI របស់ចិន បានកើនឡើង ៤៩,៨ ក្នុងខែកញ្ញា ធៀបនឹងតួលេខ ៤៩,៤ ក្នុងខែសីហា ប៉ុន្តែកំណើនបន្តិចនេះនៅតែទាបជាងសញ្ញា ៥០ ដែលត្រូវការ៕