តំណាងពាណិជ្ជកម្មរបស់សហរដ្ឋអាមេរិក លោក Jamieson Greer បាននិយាយកាលពីថ្ងៃអង្គារ (៣០ កញ្ញា) ថា អត្រាពន្ធរបស់សហរដ្ឋអាមេរិក លើការនាំចូលរបស់ប្រទេសចិន ក្នុងរង្វង់ប្រហែល ៥៥% គឺជា "ស្ថានភាពដ៏ល្អ" ប៉ុន្តែរដ្ឋបាលរបស់លោកប្រធានាធិបតី Donald Trump ចង់ស្វែងរកចំណុចរួមមួយដែលពាណិជ្ជកម្មទ្វេភាគី អាចកើនឡើងដោយសេរីបន្ថែមទៀត។

ការអត្ថាធិប្បាយរបស់លោក Greer នៅឯក្លឹបសេដ្ឋកិច្ចនៃទីក្រុងញូវយ៉កនេះ បានបង្ហាញថា ពុំមានការផ្លាស់ប្តូរភ្លាមៗឆ្ពោះទៅរកការទម្លាក់ពន្ធជាអចិន្រ្តៃយ៍នោះឡើយរបស់លោក Trump លើទំនិញចិន មុនកាលបរិច្ឆេទថ្ងៃទី១០ ខែវិច្ឆិកា សម្រាប់ពេលផុតកំណត់នៃកិច្ចព្រមព្រៀងពាណិជ្ជកម្មបណ្ដាះអាសន្នរវាងប្រទេសដែលមានសេដ្ឋកិច្ចធំជាងគេទាំងពីរក្នុងពិភពលោក។

លោក Greer បាននិយាយថា៖ បច្ចុប្បន្ន ស្ថានភាពពន្ធ ៥៥% លើចិន ប្រហែលជាគំនិតល្អរបស់លោកប្រធានាធិបតី Trump ប៉ុន្តែភាគីអាមេរិកចង់បន្តការពិភាក្សាជាប្រចាំជាមួយមន្ត្រីចិន ដើម្បីព្យាយាមសម្រេចបាននូវទំនាក់ទំនងពាណិជ្ជកម្មដែលមានតុល្យភាពជាងមុន ដល់ចំណុចដែលភាគីទាំងពីរអាចបង្កើនពាណិជ្ជកម្មក្នុង "ទំនិញមិនរសើប" ដូចជាផលិតផលកសិកម្មរបស់សហរដ្ឋអាមេរិក និងទំនិញប្រើប្រាស់របស់ចិនជាដើម។

គួរឱ្យដឹងថា កិច្ចព្រមព្រៀងពាណិជ្ជកម្មបន្ទាបពន្ធបណ្ដាះអាសន្នរវាងភាគីទាំងពីរគ្រោងផុតកំណត់នៅថ្ងៃទី១០ ខែវិច្ឆិកា លុះត្រាតែមន្ត្រីអាមេរិក និងចិន យល់ព្រមបន្តកិច្ចព្រមព្រៀងជាថ្មីទៀត បើពុំនោះសោត ពន្ធនឹងត្រូវកំណត់ឡើងវិញប្រហែល ១៤៥% នៅខាងសហរដ្ឋអាមេរិក និង ១២៥% នៅខាងភាគីចិន ដែលជាអត្រាដ៏គ្រោះថ្នាក់ ស្ទើរតែអាចបញ្ឈប់ពាណិជ្ជកម្មអាមេរិក-ចិនទាំងអស់៕