នាយករដ្ឋមន្ត្រីដាណឺម៉ាក លោកស្រី Mette Frederiksen កំពុងប្រឈមនឹងការសាកល្បងដ៏តានតឹងមួយ នៅមុនកិច្ចប្រជុំកំពូលអឺរ៉ុបធំៗចំនួន ២ នៅក្នុងដែនដីរបស់ខ្លួន ខណៈដែលការលុកលុយដោយយានដ្រូន នាពេលថ្មីៗនេះ លើហេដ្ឋារចនាសម្ព័ន្ធសំខាន់ៗ បានធ្វើឲ្យអាជ្ញាធររបស់ប្រទេសនេះមានការភ្ញាក់ផ្អើលយ៉ាងខ្លាំង។

បន្ទាប់ពីកើតមានឧប្បត្តិហេតុទាំងនោះ អំណាចរបស់លោកស្រី Frederiksen ហាក់ដូចជាចាប់ផ្ដើមចុះខ្សោយ ដោយសារតែការឆ្លើយតបមិនបានគ្រប់គ្រាន់ និងការពឹងផ្អែកទៅលើប្រទេសបារាំង អាល្លឺម៉ង់ ស៊ុយអែត ហ្វាំងឡង់ ហូឡង់ សហរដ្ឋអាមេរិក និងអ៊ុយក្រែន ដើម្បីជួយការពារទីក្រុង Copenhagen (កូប៉ិនហាក)។

សម្ព័ន្ធមិត្ត និងគូប្រជែងនយោបាយ សុទ្ធតែបានរិះគន់រដ្ឋាភិបាលរបស់លោកស្រីដូចគ្នា ចំពោះឧប្បត្តិហេតុយានដ្រូននេះ។ មេដឹកនាំសង្គមសេរីនិយម លោក Martin Lidegaard បានប្រាប់សារព័ត៌មាន Politiken កាលពីសប្តាហ៍មុនថា «ការផ្លាស់ប្តូរគំរូដែលយើងត្រូវការ គឺផ្តោតកាន់តែខ្លាំងលើការត្រៀមខ្លួនរបស់យើងនៅទីនេះ និងឥឡូវនេះ«។ គណបក្សរបស់លោក Lidegaard មិនមែនជាផ្នែកនៃក្រុមចម្រុះកណ្តាលនិយមរបស់លោកស្រី Frederiksen នោះទេ ប៉ុន្តែបានយល់ស្របដោយភាគច្រើនជាមួយរដ្ឋាភិបាល ជុំវិញបញ្ហាអ៊ុយក្រែន។

ប្រព័ន្ធផ្សព្វផ្សាយអនឡាញ Pio ដែលមានទំនាក់ទំនងផ្នែកមនោគមវិជ្ជាជាមួយគណបក្សរបស់លោកស្រី Frederiksen ក៏បានកត់សម្គាល់ផងដែរថា លោកស្រីបានបាត់បង់ប្រជាប្រិយភាព ចាប់តាំងពីមានការលុកលុយរបស់យានដ្រូន។ ហើយបើយោងតាមការស្ទង់មតិកាលពីថ្ងៃចន្ទដោយស្ថាប័ន Voxmeter បានឲ្យដឹងថា គណបក្សសង្គមប្រជាធិបតេយ្យ (SDP) របស់លោកស្រី ឥឡូវនេះ កំពុងមានសំឡេងគាំទ្រ ២០ភាគរយ ដោយធ្លាក់ចុះពី ២៧ភាគរយ បើប្រៀបធៀបទៅនឹងឆ្នាំ២០២២ ប៉ុន្តែបានថយកម្រិតតិចតួច បើធៀបកាលពីមួយខែមុន។

គួរបញ្ជាក់ថា អស់រយៈពេលជាច្រើនឆ្នាំមកនេះ លោកស្រី Frederiksen បានសាងនូវមូលធននយោបាយ តាមរយៈការគ្រប់គ្រងដ៏រឹងមាំ ការគាំទ្រអ៊ុយក្រែនមិនងាករេ រក្សាជំហរយ៉ាងច្បាស់លាស់ ចំពោះរុស្ស៊ី និងបានប្ដូរផ្លាស់ពីការសង្ស័យទីក្រុងប្រ៊ុចសែលទៅជាដៃគូសហភាពអឺរ៉ុប (EU) ដ៏គួរឲ្យទុកចិត្ត៕