នាយករដ្ឋមន្រ្តីកាតាព្រះអង្គម្ចាស់ Sheikh Mohammed bin Abdulrahman bin Jassim Al Thani មានបន្ទូលថា ផែនការបទឈប់បាញ់តំបន់ហ្កាហ្សាបញ្ចេញដោយប្រធានាធិបតីសហរដ្ឋអាមេរិកលោក Donald Trump ឈានដល់គោលបំណងសំខាន់ៗកំណត់ដោយក្រុមសម្របសម្រួល បញ្ឈប់ការកាប់សម្លាប់ និងការជម្លៀសខ្លួនជនប៉ាឡេស្ទីន ហើយព្រះអង្គជំរុញឲ្យភាគីទាំងអស់ ក្តោបក្តាប់សន្ទុះមួយនេះ ដើម្បីបញ្ចប់សង្រ្គាមរបស់អ៊ីស្រាអែល ។

នៅក្នុងបទសម្ភាសន៍ជាមួយកាសែត Al Jazeera ដែលបានចេញផ្សាយនៅថ្ងៃពុធនេះ ព្រះអង្គម្ចាស់ Sheikh Mohammed មានបន្ទូលថា ទីក្រុងដូហា បានបញ្ជូនផែនការដែលត្រូវបានគាំទ្ររួចទៅហើយដោយនាយករដ្ឋមន្រ្តីអ៊ីស្រាអែលលោក Benjamin Netanyahu ទៅកាន់ក្រុមចរចារបស់ក្រុមហាម៉ាស ដើម្បីពិភាក្សាលើលក្ខខណ្ឌរបស់វា ។

ទ្រង់ទទួលស្គាល់ថា ផែនការមានការលំបាកជាក់ស្តែង និងការអនុវត្ត ប៉ុន្តែវាដោះស្រាយអាទិភាពបន្ទាន់បំផុត បញ្ចប់ការបង្ហូរឈាមគ្នានៅតំបន់ហ្កាហ្សាស្រ្ទីប ខណៈបើកទូលាយចំពោះឱកាស ។

ព្រះអង្គមានបន្ទូលទៀតថា អ្នករាល់គ្នាឯកភាពលើការបញ្ឈប់សង្រ្គាម ការពារការជម្លៀសខ្លួន ហើយនិងការដកទាហានទាំងស្រុងរបស់អ៊ីស្រាអែល ។ ទាំងនេះ គឺជាបញ្ហា ៣ចំណុចដ៏សំខាន់ ហើយភាគីដែលទទួលខុសត្រូវផ្ទាល់សម្រាប់ការគ្រប់គ្រងតំបន់ហ្កាហ្សា គឺជាជនប៉ាឡេស្ទីនខ្លួនឯងផ្ទាល់ ។

គួរឲ្យដឹងថា កាលពីថ្ងៃអង្គារម្សិលមិញ លោក Netanyahu បាននិយាយសុំអភ័យទោសជាផ្លូវការ ដល់កាតា សម្រាប់ការវាយប្រហារតាមច្រកអាកាសស្លាប់មនុស្សរបស់អ៊ីស្រាអែលកាលពីដើមខែនេះ ។

ការសុំអភ័យទោសនេះ ត្រូវបានធ្វើឡើងនៅក្នុងការជជែកគ្នាតាមទូរស័ព្ទជាមួយព្រះអង្គម្ចាស់ Sheikh Mohammed ដោយមានការសម្របសម្រួលពីលោកប្រធានាធិបតីសហរដ្ឋអាមេរិក Donald Trump ៕