ភ្នំពេញ ÷ មន្រ្តីជាន់ខ្ពស់ធនាគារជាតិនៃកម្ពុជា អញ្ជើញជួបសំណេះសំណាល អបអរសាទរ និងផ្តល់រង្វាន់លើកទឹកចិត្តដល់សិស្សានុសិស្ស ដែលបានប្រឡងជាប់ជាស្ថាពរ សញ្ញាបត្រមធ្យមសិក្សាទុតិយភូមិឆ្នាំសិក្សា ២០២៤-២០២៥ នៅស្រុកប្រាសាទសំបូរ និងស្រុកសន្ទុក ខេត្តកំពង់ធំ។

 លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា នៅថ្ងៃទី១ ខែតុលា ឆ្នាំ២០២៥នេះ បានអញ្ជើញជួប សំណេះសំណាល អបអរសាទរ និងផ្តល់រង្វាន់លើកទឹកចិត្តដល់សិស្សានុសិស្ស ដែលបានប្រឡងជាប់ជាស្ថាពរ សញ្ញាបត្រមធ្យម សិក្សាទុតិយភូមិឆ្នាំសិក្សា២០២៤-២០២៥ នៅស្រុកប្រាសាទសំបូរ និងស្រុកសន្ទុក ខេត្តកំពង់ធំ, លោកជំទាវបណ្ឌិតបានកោត សរសើរ និងវាយតម្លៃខ្ពស់ ចំពោះសិស្សដែលបានប្រឡងជាប់ ដោយបាននាំមកនូវកិត្តិយស និងសេចក្តីថ្លៃថ្នូរជូនក្រុមគ្រួសារ និង សង្គមជាតិ និងបានលើកទឹកចិត្តចំពោះសិស្សដែលមិនទទួលបានជោគជ័យសម្រាប់ការប្រឡងផងដែរ, លោកជំទាវបានជំរុញឱ្យប្រឹង ប្រែងរៀនសូត្របន្តទៀត ដោយកុំបោះបង់ចោលត្រឹមនេះ និងត្រូវចាត់ទុកថា ឆ្នាំនេះបានផ្តល់នូវបទពិសោធន៍ថ្មីសម្រាប់បន្តប្រឹងប្រែង និងត្រៀមខ្លួនប្រឡងជាថ្មីនៅឆ្នាំសិក្សាក្រោយ។

 លោកជំទាវបណ្ឌិត ក៏បានជម្រាបជូនដល់សិស្សានុសិស្ស និងមាតាបិតា-អាណាព្យាបាលឱ្យដឹងថា សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានប្រកាសផ្តល់អាហារូបករណ៍ដ៏ថ្លៃថ្លា របស់សម្តេចអគ្គមហា សេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ចំនួន ៤.៥៧០ កន្លែង សម្រាប់ថ្នាក់សញ្ញាបត្របច្ចេកទេសបរិញ្ញាបត្ររង និងបរិញ្ញាបត្រឆ្នាំសិក្សា២០២៥-២០២៦ ដោយឆ្លងកាត់ការប្រឡងនិងមិនឆ្លងកាត់ការប្រឡង។ លោកជំទាវក៏បានជម្រាបជូនផងដែរ នៃការផ្តល់អាហារូបករណ៍របស់ធនាគារជាតិនៃកម្ពុជា ក្នុងនោះសិស្សរៀនពូកែនិទ្ទេស A ទាំងអស់នៅទូទាំងខេត្តកំពង់ធំ និងទទួលបានអាហារូបករណ៍ពេញ ១០០% ពីវិទ្យាស្ថានសិក្សាបច្ចេកទេសធនាគារ (ទាំងថ្លៃសិក្សានិងការឧបត្ថម្ភផ្សេងៗ)។ ចំពោះសិស្សទទួលបាននិទ្ទេស B ធនាគារជាតិនៃកម្ពុជា នឹងផ្តល់អាហារូបករណ៍ឥតបង់ថ្លៃសិក្សាតែប៉ុណ្ណោះ ហើយធនាគារជាតិនៃកម្ពុជា ក៏នឹង ផ្តល់អាហារូបករណ៍សម្រាប់ការស្នាក់នៅដោយឥតគិតថ្លៃ នៅអន្តេវាសិកដ្ឋានរបស់វិទ្យាស្ថានសិក្សាបច្ចេកទេសធនាគារដល់សិស្សនិទ្ទេស A មកពីខេត្តកំពង់ធំ ដែលមានស្ថានភាពគ្រួសារក្រីក្រ ជីវភាពខ្វះខាត ហើយចង់បន្តការសិក្សានៅរាជធានីភ្នំពេញ តាមបណ្តា ឧត្តមសិក្សារដ្ឋផ្សេងៗផងដែរ។

ទាក់ទិនការប្រឡងទុតិយភូមិឆ្នាំសិក្សា២០២៤-២០២៥, នាសម័យប្រឡងកាលពីថ្ងៃទី ២៨-២៩ ខែសីហា ឆ្នាំ២០២៥ ខេត្តកំពង់ធំ មានបេក្ខជនប្រឡងសរុបចំនួន ៥.៧៩៥រូប (ស្រី ៣.៣១៩រូប) ក្នុងនោះបេក្ខជនប្រឡងមកពីវិទ្យាល័យតាអោក និងវិទ្យាល័យកំពង់ឈើទាល ក្នុងស្រុកប្រាសាទសំបូរខេត្តកំពង់ធំ មានចំនួន ២២៤រូប និងបានប្រឡងជាប់ជាស្ថាពរ ២០៩ រូប (ត្រូវប្រមាណជាង ៩៣%) ទទួលបាននិទ្ទេស A មួយរូប ។ រីឯបេក្ខជនមកពីវិទ្យាល័យ ហ៊ុន សែន ភ្នំសន្ទុក វិទ្យាល័យតាំងក្រសាំង និងវិទ្យាល័យកំពង់ថ្ម ក្នុងស្រុកសន្ទុក មានចំនួន ៥៨៥ រូប ក្នុងនោះ ៥១៦ រូប (ត្រូវជាង ៨៨% ) បានប្រឡងជាប់ជាស្ថាពរ ទទួល បាននិទ្ទេស A ចំនួន៧រូប។

គួររំលេចថា ធនាគារជាតិនៃកម្ពុជា តែងតែចូលរួមចំណែកគាំទ្រ និងលើកកម្ពស់ការអប់រំដល់សិស្សានុសិស្ស តាមរយៈការឧបត្ថម្ភ វគ្គបំប៉នបន្ថែមជារៀងរាល់ឆ្នាំ សម្រាប់សិស្សានុសិស្សប្រឡងសញ្ញាបត្រមធ្យមសិក្សាទុតិយភូមិ៕

អត្ថបទ៖ សុន រ៉ាឌី