កម្មវិធីស្បៀងអាហារពិភពលោក WFP របស់អង្គការសហប្រជាជាតិ បានចេញការព្រមានជាថ្មីថា រដ្ឋរ៉ាឃីន (Rakhine) — ដែលជាតំបន់ឆ្នេរភាគខាងលិច រងគ្រោះដោយជម្លោះជាច្រើនឆ្នាំ និងអំពើហិង្សាជនជាតិភាគតិច ផ្តោតទៅលើជនមូស្លីមរ៉ូហ៊ីងយ៉ា — ឥឡូវនេះ កំពុងតែប្រឈមមុខនឹងវិបត្តិអត់ឃ្លាន "គួរឱ្យព្រួយបារម្ភ" និងមហន្តរាយ ដោយសារតែ "ការរួមបញ្ចូលគ្នាដ៏កាចសាហាវនៃជម្លោះ ការរាំងខ្ទប់ផ្លូវជំនួយ និងការកាត់បន្ថយថវិកាសង្រ្គោះ"។

ក្នុងសន្និសីទកម្រិតខ្ពស់នៅអង្គការសហប្រជាជាតិ ទីក្រុងញូវយ៉ក ស្តីពីក្រុមជនជាតិភាគតិចមីយ៉ាន់ម៉ា កាលពីថ្ងៃអង្គារ (៣០ កញ្ញា) សប្ដាហ៍នេះ សហរដ្ឋអាមេរិក និងចក្រភពអង់គ្លេស បានប្រកាសថា ពួកគេនឹងផ្តល់ជំនួយ ៩៦លានដុល្លារ បន្ថែមទៀតដើម្បីគាំទ្រដល់ជំរំជនភៀសខ្លួនបង់ក្លាដែស ដែលមានជនជាតិរ៉ូហ៊ីងយ៉ាស្នាក់នៅជាង ១លាននាក់ ដែលភៀសខ្លួនចេញពីរដ្ឋរ៉ាឃីន។

កុមារជាង ១សែននាក់ នៅក្នុងរដ្ឋរ៉ាឃីន កំពុងរងគ្រោះពីកង្វះអាហារូបត្ថម្ភធ្ងន់ធ្ងរ ដោយមានតិចជាង ២% ប៉ុណ្ណោះនៃកុមារ អាចទទួលបានការព្យាបាល នេះបើយោងតាមទិន្នន័យដែលមិនបានរាយការណ៍ពីមុន ផ្តល់ដោយបុគ្គលិកជំនួយ។

លោក Michael Dunford ប្រធានស្តីទី UN ប្រចាំនៅមីយ៉ាន់ម៉ា បាននិយាយថា ការភ័យខ្លាចផ្នែកសន្តិសុខ និងការរឹតបន្តឹងដោយរបបសឹក ព្រមទាំងកងទ័ពឧទ្ទាម Arakan បានធ្វើឱ្យអង្គការសហប្រជាជាតិ មិនអាចផ្លាស់ទីស្បៀងអាហារ ហួសពីទីក្រុង Sittwe ដែលគ្រប់គ្រងដោយយោធា ដើម្បីចូលទៅក្នុងផ្នែកកណ្តាល និងភាគខាងជើងនៃរដ្ឋរ៉ាឃីនបានឡើយ។ បុគ្គលិកជំនួយនិយាយថា ការរួមបញ្ចូលគ្នានៃជម្លោះ ទីផ្សារជិតទទេស្អាត សេដ្ឋកិច្ចជាប់គាំង និងការបិទផ្លូវ កំពុងខ្ទប់ដង្ហើមសេដ្ឋកិច្ចរបស់អ្នកស្រុករ៉ាឃីន ក្នុងកម្រិតមួយដែលមិនធ្លាប់មានពីមុនមក៕