ប្រធានាធិបតីសហរដ្ឋអាមេរិក លោក Donald Trump បានប្រកាសកាលពីថ្ងៃពុធ (១ តុលា) ថា សណ្តែកសៀង នឹងក្លាយជារបៀបវារៈដ៏សំខាន់មួយក្នុងអំឡុងពេលកិច្ចប្រជុំរបស់លោក ជាមួយប្រធានាធិបតីចិន លោក Xi Jinping ដែលគ្រោងនឹងប្រព្រឹត្តទៅ "ក្នុងរយៈពេល ៤សប្តាហ៍" ខាងមុខ។

លោក Trump ដែលបានសន្យាគាំទ្រកសិករសណ្តែកសៀងអាមេរិក បានសរសេរបង្ហោះនៅលើបណ្ដាញសង្គម Truth Social ថា "រូបលោកនឹងជួបជាមួយប្រធានាធិបតី Xi នៃប្រទេសចិន ក្នុងរយៈពេល ៤សប្តាហ៍ទៀត ហើយសណ្តែកសៀងនឹងក្លាយជាប្រធានបទសំខាន់នៃកិច្ចពិភាក្សានោះ" ដោយមិនបញ្ជាក់លម្អិតបន្ថែមនោះឡើយ។

ក្រុមហ៊ុននាំចូលរបស់ចិន មិនទាន់បានទិញសណ្តែកសៀងពីការប្រមូលផលរដូវស្លឹកឈើជ្រុះរបស់កសិករអាមេរិកឡើយ ក្នុងអំឡុងសង្គ្រាមពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំង ដែលធ្វើឱ្យកសិករអាមេរិក ខាតបង់ប្រាក់រាប់ពាន់លានដុល្លារក្នុងការលក់។ ចិន ដែលជាប្រទេសនាំចូលសណ្តែកសៀងលំដាប់កំពូលរបស់ពិភពលោក បានងាកទៅរកអាមេរិកខាងត្បូងសម្រាប់ការផ្គត់ផ្គង់ជំនួសវិញ ដោយបានដាក់សម្ពាធកាន់តែខ្លាំងលើតម្លៃសណ្តែកសៀងរបស់អាមេរិក។

កាលពីខែមុន លោក Trump និយាយថា លោក និងលោក Xi បានព្រមព្រៀងក្នុងអំឡុងពេលកិច្ចសន្ទនាតាមទូរសព្ទមួយថានឹងជួបទល់មុខគ្នានៅកូរ៉េខាងត្បូង ដើម្បីពិភាក្សាពីជម្លោះពាណិជ្ជកម្មដ៏ជូរចត់។ មេដឹកនាំទាំងពីរគ្រោងនឹងជួបនៅក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក APEC ក្នុងអំឡុងសប្តាហ៍ចុងក្រោយនៃខែតុលា នៅទីក្រុង Gyeongju កូរ៉េខាងត្បូង។ លោក Trump ក៏បាននិយាយដែរថា លោកនឹងទៅបំពេញទស្សនកិច្ចនៅចិន ដើមឆ្នាំក្រោយនេះ ហើយលោក Xi នឹងទៅកាន់សហរដ្ឋអាមេរិកវិញនៅពេលក្រោយ៕