អង្គការសហប្រជាជាតិ បាននិយាយកាលពីថ្ងៃពុធថា ខ្លួនបានផ្ទៀងផ្ទាត់ការស្លាប់របស់ជនស៊ីវិល ១០៣ នាក់ នៅក្នុងប្រទេសលីបង់ ចាប់តាំងពីបទឈប់បាញ់កាលពីខែវិច្ឆិកា ឆ្នាំ ២០២៤ ជាមួយអ៊ីស្រាអែល ដោយទាមទារឲ្យបញ្ឈប់ការរងទុក្ខដែលកំពុងបន្តនេះ។

ការិយាល័យសិទ្ធិមនុស្សរបស់អង្គការសហប្រជាជាតិ បានអំពាវនាវឲ្យមានកិច្ចខិតខំប្រឹងប្រែងជាថ្មីសម្រាប់បទឈប់បាញ់ដ៏យូរអង្វែង ដែលមានរយៈពេលជាង ១០ខែ ពីបទឈប់បាញ់ដែលបានព្រមព្រៀងគ្នា។

ប្រធានសិទ្ធិមនុស្សរបស់អង្គការសហប្រជាជាតិ លោក Volker Turk បាននិយាយនៅក្នុងសេចក្តីថ្លែងការណ៍មួយថា៖«យើងនៅតែឃើញផលប៉ះពាល់ដ៏អាក្រក់នៃការវាយប្រហារដោយយន្តហោះ និងដ្រូននៅក្នុងតំបន់លំនៅឋាន ក៏ដូចជានៅជិតកងរក្សាសន្តិភាពរបស់អង្គការសហប្រជាជាតិ នៅភាគខាងត្បូង»។

អ៊ីស្រាអែលបានបន្តការវាយប្រហារស្ទើររៀងរាល់ថ្ងៃលើប្រទេសលីបង់ ដោយជាធម្មតានិយាយថា ខ្លួនកំពុងកំណត់គោលដៅប្រតិបត្តិការ ឬទីតាំងរបស់ក្រុមហេសបូឡា ទោះបីជាមានបទឈប់បាញ់ ដែលព្យាយាមបញ្ចប់អរិភាព ជាងមួយឆ្នាំ រួមទាំងសង្រ្គាមបើកចំហពីរខែ ជាមួយក្រុមដែលគាំទ្រដោយអ៊ីរ៉ង់ក៏ដោយ៕