ភ្នំពេញ៖ ឯកឧត្ដម តាកាហាស៊ី ហ្វូមីអាគី (TAKAHASHI FUMIAKI) ប្រធាន សមាគមជប៉ុន-កម្ពុជានិងជាអតីតឯកអគ្គរាជទូតជប៉ុនប្រចាំកម្ពុជានឹងដឹកនាំប្រតិភូក្រុមអ្នកវិនិយោគសហគ្រាសធុនមធ្យម (SME) មកកាន់ព្រះរាជាណាចក្រកម្ពុជា នាខែមេសាខាងមុខ ដើម្បីស្វែងរកឱកាសវិនិយោគនៅកម្ពុជា។
ឯកឧត្តម តាកាហាស៊ី ហ្វូមីអាគី លើកឡើងបែបនេះ ក្នុងពេលសំដែងការគួរសម និងពិភាក្សាការងារជាមួយ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី១ ខែកុម្ភៈ នៅវិមានសន្តិភាព។
ឯកឧត្តម អ៊ាង សុផ្លែត រដ្ឋលេខាធិការក្រសួងបរិស្ថាន និងជាអ្នកនាំពាក្យរបស់សម្តេចតេជោបានប្រាប់ដល់ក្រុមអ្នកសារព័ត៌មានថា ឯកឧត្តម តាកាស៊ី ហ្វូមីអាគី បានសម្ដែងនូវការអបអរសាទរនិងបានគោរពសុំអនុញ្ញាតដ៏ខ្ពង់ខ្ពស់ពីសម្ដេចតេជោ ដើម្បីនាំប្រតិភូក្រុមអ្នកវិនិយោគធុនកណ្តាលមកកាន់ព្រះរាជាណាចក្រកម្ពុជានាខែមេសាខាងមុខ។
ជាការឆ្លើយតប សម្ដេចតេជោ បានថ្លែងអំណរគុណជូនចំពោះឯកឧត្តម តាកាហាស៊ី ហើយក៏បានជម្រាបជូនឯក ឧត្តមនិងគណៈប្រតិភូអំពីវិធានការនិងចំណាត់ការនិងការទប់ស្កាត់ជំងឺកូវីដ-១៩ ហើយក៏បានស្វាគមន៍ចំពោះប្រតិភូអ្នកវិនិយោគធុនកណ្ដាលដែលឯកឧត្តម តាកា ហាស៊ី មានបំណងនាំមកព្រះរាជាណាចក្រកម្ពុជា។
ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគជប៉ុនសរុបចំនួន ២១១ គិតត្រឹមថ្ងៃទី៣១ ខែកក្កដា ដែលមានតម្លៃប្រហែល ៣.១៤ ពាន់លានដុល្លារចាប់តាំងពីការបង្កើតឡើងក្នុងឆ្នាំ១៩៩៤។
ទិន្នន័យពីអង្គភាព JETRO បង្ហាញថា ក្នុងឆមាសទីមួយនៃឆ្នាំ ២០២១ ការនាំចេញរបស់ កម្ពុជាទៅកាន់ ប្រទេសជប៉ុនមានតម្លៃ ៨១៤ លានដុល្លារ កើនឡើង ២.៧ ភាគរយបើធៀបនឹងឆមាសទីមួយនៃឆ្នាំ ២០២០ ហើយការនាំចូលពីប្រទេសជប៉ុនមានតម្លៃ ២៩៥ លានដុល្លារ កើនឡើង៣៥ ភាគរយ៕ អត្ថបទ៖ វណ្ណៈ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
