ភ្នំពេញ ៖ ក្រុមហ៊ុន BYD និងក្រុមហ៊ុន Huawei នឹងសហការរៀបចំសម្របសម្រួល លើបេសកកម្មជំរុញការវិនិយោគ នៅក្នុងវិស័យ ឧស្សាហកម្មយានយន្ត និងអេឡិចត្រូនិក នៅក្នុងទីក្រុង Shenzhen ដើម្បីផ្សព្វផ្សាយអំពីគុណសម្បត្តិ និងចំណុចវិជ្ជមាននានា ពាក់ព័ន្ធការវិនិយោគនៅកម្ពុជា។

លោក Xiao Haipin នាយកប្រតិបត្តិនៃការិយាល័យប្រធានសម្ព័ន្ធក្រុមហ៊ុន BYD (Executive Director of BYD Group President’s Office) នៅក្នុងជំនួបសម្តែងការគួរសម និងពិភាក្សាការងារ ជាមួយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី២ ខែតុលា ឆ្នាំ២០២៥នេះ, បានសម្តែងនូវអំណរគុណយ៉ាងជ្រាលជ្រៅ ចំពោះ កិច្ចសម្របសម្រួលនានារបស់រាជរដ្ឋាភិបាល ក៏ដូចជាក្រុមប្រឹក្សាអភិវឌ្ឍន៍កម្ពុជា ចាប់តាំងពីដំណាក់កាលដំបូង នៃការចូលមកកាន់ ទីផ្សារកម្ពុជា, ដំណាក់កាលនៃការសាងសង់រោងចក្រ និងរហូតឈានដល់ការចាប់ផ្តើមដំណើរប្រតិបត្តិការ ដំឡើងរថយន្តរបស់ខ្លួន ផងដែរ។ 

លោកក៏បានពាំនាំនូវការកត់សម្គាល់ខ្ពស់ ពីសំណាក់គណៈគ្រប់គ្រងសម្ព័ន្ធ BYD ដែលមានការភ្ញាក់ផ្អើល ចំពោះល្បឿន នៃការអនុវត្តការងារនៅកម្ពុជា ហើយគ្រោងនឹងយកជាករណីសិក្សា សម្រាប់ការវិនិយោគបន្តបន្ទាប់នាពេលអនាគត។ ទន្ទឹមនេះ ក្រុមហ៊ុនបានសម្តែងនូវការប្តេជ្ញាចិត្ត ចូលរួមសហការជាមួយក្រុមហ៊ុន Huawei ក្នុងការរៀបចំសម្របសម្រួលលើបេសកកម្មជំរុញ ការវិនិយោគ នៅក្នុងវិស័យឧស្សាហកម្ម យានយន្ត និងអេឡិចត្រូនិក របស់ក្រុមប្រឹក្សាអភិវឌ្ឍន៍កម្ពុជា នៅក្នុងទីក្រុង Shenzhen សាធារណរដ្ឋប្រជាមានិតចិន នាពេលអនាគត។

ជាការឆ្លើយតប, ឯកឧត្តមឧបនាយករដ្ឋមន្ត្រី បានសម្តែងនូវក្តីសោមនស្សរីករាយចំពោះគណៈប្រតិភូក្រុមហ៊ុន លើកំណើន ប្រជាប្រិយភាពនៃការប្រើប្រាស់រថយន្តអគ្គិសនី BYD នៅកម្ពុជា។ ឯកឧត្តមរំពឹងថា សម្ព័ន្ធ BYD នឹងពាំនាំអំពីគុណសម្បត្តិ និងចំណុច វិជ្ជមាននានា ដែលពាក់ព័ន្ធការវិនិយោគនៅកម្ពុជាផ្សព្វផ្សាយបន្តទៅកាន់ដៃគូវិនិយោគ និងសហគមធុរកិច្ចរបស់ខ្លួនផងដែរ។ ឯកឧត្តម ឧបនាយករដ្ឋមន្ត្រី បានបន្ថែមថា ក្រុមប្រឹក្សាអភិវឌ្ឍន៍កម្ពុជា ដែលជាសេនាធិការច្រកចេញចូលតែមួយរបស់រាជរដ្ឋាភិបាល រីករាយ និងត្រៀមលក្ខណៈជានិច្ច ក្នុងការសម្របសម្រួលរាល់គ្រប់កិច្ចការងារវិនិយោគរបស់វិស័យឯកជននៅកម្ពុជា សំដៅធានាបាននូវ បរិយាកាសវិនិយោគប្រកបដោយភាពបត់បែន អំណោយផល និងអនុគ្រោះបំផុតជូនដល់វិនិយោគិន៕ អត្ថបទ៖ សុន រ៉ាឌី