ស៊ីហ្គេម៖ កម្ពុជាក្នុងនាមសហប្រធានក្រុមប្រឹក្សាកីឡាអាស៊ីអាគ្នេយ៍ គ្រោងរៀបចំកិច្ចប្រជុំលើកដំបូងនាចុងខែកុម្ភៈ ឆ្នាំ២០២២ នេះនៅខេត្តសៀមរាបដើម្បីបង្ហាញវឌ្ឍនភាព និងការត្រៀមខ្លួនធ្វើម្ចាស់ផ្ទះព្រឹត្តិការណ៍ជាប្រវត្តិសាស្ត្រស៊ីហ្គេមលើកទី៣២ និងអាស៊ានប៉ារ៉ាហ្គេម លើកទី១២ នាឆ្នាំ២០២៣ ខាងមុខ។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC និងជាអគ្គលេខាធិការគណៈកម្មាធិការជាតិអូឡាំពិកកម្ពុជាបានឲ្យដឹងថា កម្ពុជាកំពុងដំណើរការរៀបចំកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ ហើយជាកំណត់ត្រាថ្មីដំបូងសម្រាប់កម្ពុជាក្នុងការបើកកិច្ចប្រជុំដោយផ្ទាល់ បន្ទាប់ពីស្ថានភាពកូវីដ-១៩ ធូរស្រាល ដ្បិតកិច្ចប្រជុំកន្លងមកបានត្រឹមរៀបចំតាមប្រព័ន្ធ Online ប៉ុណ្ណោះ។ គួរដឹងថា បច្ចុប្បន្នឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ត្រូវបានសមាជិកក្រុមប្រឹក្សាកីឡាអាស៊ីអាគ្នេយ៍ទាំង ១១ប្រទេសធ្វើការគាំទ្រជាសហប្រធាន ដើម្បីដំណើរការរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅកម្ពុជាកាលពីចុងឆ្នាំ២០២១ កន្លងទៅ។ រីឯសហប្រធានមួយទៀតគឺវៀតណាម បន្ទាប់ពីពួកគេបានពន្យារពេលរៀបចំស៊ីហ្គេមលើកទី៣១ ពីចុងឆ្នាំ២០២១ រហូតដល់ខែឧសភា ឆ្នាំ២០២២ ខាងមុខ។
តាមរយៈនេះកម្ពុជាមានសិទ្ធក្នុងការរៀបចំកិច្ចប្រជុំ និងដំណើរការនីតិវិធីផ្សេងៗ ដើម្បីរៀបចំដំណើរឆ្ពោះទៅធ្វើម្ចាស់ផ្ទះព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជា ក្រោយទន្ទឹងរង់ចាំអស់រយៈពេល ៦៤ឆ្នាំ ជាក់ស្ដែងកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ ដែលគ្រោងធ្វើនៅខេត្តសៀមរាបនាចុងខែកុម្ភៈនេះត្រូវបានអ្នកជំនាញរំពឹងថា ជាផ្លែផ្កា និងជាសញ្ញាណវិជ្ជមានមួយនៃដំណើរឆ្ពោះទៅរកភាពជោគជ័យ នៅក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
