​​អ៊ុយ​ក្រែ​ន៖ យោង​តាម​របាយការណ៍​ជាច្រើនឲ្យដឹងថា ​ប្រធានាធិបតី​អ៊ុយ​ក្រែ​នលោក Volodymyr Zelensky កាលពី​ថ្ងៃ​អង្គារ​បាន​ព្រមាន​ថា ​ការឈ្លានពាន​របស់​រុស្ស៊ី​មកលើ​អ៊ុយ​ក្រែ​ន​អាច​បង្ក​ឲ្យ​មាន​សង្គ្រាម​ពេញ​ទូទាំង​តំបន់​អឺរ៉ុប។

​ខណៈ​ទទួល​ស្វាគមន៍​ដំណើរ​ទស្សនកិច្ច​របស់​លោកនាយក​រដ្ឋមន្ត្រី​អង់គ្លេស​លោក Boris Johnson នៅក្នុង​ទីក្រុង​គៀវ លោក Zelensky បាន​និយាយថា នេះ​នឹងមិន​ក្លាយជា​សង្គ្រាម​រវាង​អ៊ុយ​ក្រែ​ន និង​រុស្ស៊ី​ទេ តែ​វា​នឹង​ក្លាយជា​សង្គ្រាម​សម្រាប់​តំបន់​អឺរ៉ុប​ទាំងមូល​។ វា​ជា​សង្គ្រាម​ពេញបន្ទុក​។ ជាមួយគ្នា​នោះដែរលោកនាយក​រដ្ឋមន្ត្រី​អង់គ្លេស Boris Johnson បាន​ព្រមាន​ថា ច​ម្រ​ភព​អង់គ្លេសនឹងដាក់​ទណ្ឌកម្ម​ភ្លាម​ទៅ​រុស្ស៊ី បើ​ហាន​ឈ្លានពាន​អ៊ុយ​ក្រែ​ន​។ ​ការអត្ថាធិប្បាយ​របស់​លោក Zelensky មាន​ឡើង​បន្ទាប់ពី​លោក​បាន​ចោទប្រកាន់​លោកខាងលិច​ថា​ បាន​បង្ក​ឲ្យ​មានការ​ភ័យ​ស្លន់ស្លោ​ជុំវិញ​ការ​គំរាម​ឈ្លានពាន​របស់​រុស្ស៊ី​។ ​លោក​បានបង្ហាញ​ក្ដីបារម្ភ​ថា វោហា​សាស្ត្រជុំវិញ​វិបត្តិ​នេះបាន​កំពុង​គំរាមកំហែង​ដល់​ស្ថិរភាព​សេដ្ឋកិច្ច​ប្រទេស​របស់លោក​។​ ​ជាការ​អំពាវនាវ​ដល់​រុស្ស៊ី លោក​ប្រធានាធិបតីរូបនេះក៏បាន​លើកឡើង​ផងដែរ​ថា មានតែ​ការដក​ទ័ព​រុស្ស៊ី​ចេញពី​ជិត​ព្រំដែន​របស់​ប្រទេស​ទាំង​២​ ទេដែល​អាច​បង្ហាញថា ទីក្រុង​មូ​ស្គូ​ពិតជា​មាន​ចេតនា​ចង់បន្ធូរបន្ថយ​ភាព​តានតឹង​មែន​៕

អត្ថបទ៖ សុខមាន