ភាពតានតឹងថ្មីៗបានផ្ទុះឡើងនៅទូទាំងទ្វីបអឺរ៉ុប និងមហាសមុទ្រអាត្លង់ទិក ខណៈដែលរុស្ស៊ី បានចេញការព្រមានយ៉ាងម៉ឺងម៉ាត់ដល់សហរដ្ឋអាមេរិកថា ការផ្គត់ផ្គង់មីស៊ីលតម្រង់គោលដៅរយៈចម្ងាយឆ្ងាយ Tomahawk ដល់អ៊ុយក្រែន នឹងបង្កឱ្យមានការកើនឡើងនៃភាពតានតឹងថ្មីយ៉ាងគ្រោះថ្នាក់បំផុត និងហានិភ័យនៅក្នុងជម្លោះដែលកំពុងបន្ត។

សារព្រមានរបស់វិមានក្រឹមឡាំង ដែលធ្វើឡើងដោយអ្នកនាំពាក្យ លោក Dmitry Peskov កាលពីថ្ងៃព្រហស្បតិ៍ (២ តុលា) នោះ បានកើតឡើងនៅពេលដែលមន្ត្រីសហរដ្ឋអាមេរិក កំពុងថ្លឹងថ្លែងលើសំណើដ៏យូរលង់របស់ទីក្រុងគីវ សម្រាប់អាវុធរយៈចម្ងាយឆ្ងាយ ២.៥០០គីឡូម៉ែត្រដ៏មានឥទ្ធិពល ដែលមានសមត្ថភាពវាយចូលជ្រៅក្នុងទឹកដីរុស្ស៊ី រួមទាំងក្រុងមូស្គូផងដែរ។

លោក Peskov បានប្រាប់ក្រុមអ្នកសារព័ត៌មានរុស្ស៊ីថា "ប្រសិនបើរឿងនេះកើតឡើងមែន នោះនឹងក្លាយជាភាពតានតឹងដ៏ធ្ងន់ធ្ងរថ្មីមួយ ដែលនឹងទាមទារឱ្យមានការឆ្លើយតបដ៏សមស្របពីភាគីរុស្ស៊ី" នេះបើយោងតាមទីភ្នាក់ងារសារព័ត៌មានរដ្ឋ TASS និងសារព័ត៌មានអន្តរជាតិជាច្រើន។ អ្នកនាំពាក្យវិមានក្រឹមឡាំងរូបនេះមិនបានរៀបរាប់លម្អិតពីទម្រង់នៃការឆ្លើយតបរបស់រុស្ស៊ីនោះទេ ប៉ុន្តែការព្រមាននេះបានគូសបញ្ជាក់ពីភាពតានតឹងកាន់តែខ្លាំងឡើងនៃដំណាក់កាលបន្ទាប់ក្នុងសង្រ្គាម។

ការជជែកវែកញែកពីរឿងមីស៊ីល Tomahawk បានក្ដៅគគុកអស់ច្រើនខែមកហើយ ប៉ុន្តែបានផ្ទុះឡើងកាន់តែខ្លាំង បន្ទាប់ពីមានសេចក្តីរាយការណ៍ថា ប្រធានាធិបតីអ៊ុយក្រែន លោក Volodymyr Zelenskyy បានទទូចសុំមីស៊ីលនេះពីលោកប្រធានាធិបតីអាមេរិក Donald Trump ក្នុងអំឡុងកិច្ចប្រជុំបិទទ្វារមួយនៅខាងក្រៅមហាសន្និបាតអង្គការសហប្រជាជាតិ UNGA កាលពីថ្ងៃទី២៣ ខែកញ្ញា កន្លងទៅ៕