ឯកឧត្តម Datuk Wira Dr. Mohd Hatta bin Md Ramli ប្រធាន​គណៈ​ប្រតិភូ​សហព័ន្ធ​នៃ​សមាជិក​សភា ម៉ាឡេស៊ីដើម្បីសន្តិភាពពិភព ដែលហៅកាត់ថា PFWP បានសន្យាថា នឹង​ខិត​​ខំ​ស្វែង​រក​ដំណោះដោយសន្តិវិធី ដើម្បីបញ្ចប់បញ្ហាជម្លោះព្រំដែនរវាងកម្ពុជា និង​ថៃ​ឲ្យ​បាន​ឆាប់​ៗ​ខាង​មុខ​នេះ។

នៅក្នុងកិច្ចជំនួបពិភាក្សាជាមួយសម្តេចមហារដ្ឋសភាធបិតី ឃួន សុដារី នាព្រឹកថ្ងៃទី៣ ខែតុលា ឆ្នាំ២០២៥នេះ ឯកឧត្តម Datuk Wira Dr. Mohd Hatta bin Md Ramli បានលើកឡើងថា ឯកឧត្តម​បានដឹងហើយអំពីបញ្ហាជម្លោះព្រំដែនកម្ពុជា និងថៃ ហើយឯកឧត្តមសន្យាថា នឹង​ខិត​ខំ​ធ្វើ​យ៉ាង​ណា​ស្វែងរកដំ ណោះស្រាយ បញ្ចប់បញ្ហានេះឲ្យបានឆាប់ៗ ដើម្បីឲ្យស្ថាន​ការណ៍​វិល​ទៅ​រក​សភាព​ដើមវិញ ដើម្បីសេចក្តី សុខ និងភាពរីកចម្រើនរវាងប្រជាជនកម្ពុជា និងប្រជាជនថៃ។

នៅក្នុងកិច្ចជំនួបនោះដែរ សម្តេចមហារដ្ឋសភាធិបតី ឃួន សុដារី ក៏បានលើកឡើងអំពីជម្លោះព្រំ ដែន​កម្ពុជា និងថៃប្រាប់​ទៅ​កាន់​ប្រធាន​គណៈ​ប្រតិភូ​សហព័ន្ធ​នៃ​សមាជិក​សភា​ម៉ាឡេស៊ី​ដើម្បី​សន្តិភាព​ពិភពលោក​បន្ថែមទៀតផងដែរថា ភាគីថៃតែងតែធ្វើការយាយីដល់កម្ពុជាជារឿយៗ បើ​ទោះ​បី​ជា​កម្ពុជា និងថៃ បានធ្វើកិច្ចព្រមព្រៀងឈប់បាញ់ជាមួយគ្នាកាលពីកន្លងទៅក៏ដោយ។

សម្តេចប្រធានរដ្ឋសភាកម្ពុជា ក៏បានប្រាប់ទៅប្រធានគណៈប្រតិភូសហព័ន្ធនៃសមាជិកសភា ម៉ាឡេស៊ី​ដើ​ម្បីសន្តិភាពពិភពផងដែរថា បញ្ហាព្រំដែនរវាងកម្ពុជា និងថៃអាច​នឹង​ឆាប់​ចប់​ប្រសិន​បើ​ថៃ​ប្រើប្រាស់​ផែនទី សន្ធិសញ្ញាបារាំង-សៀម ឆ្នាំ១៩០៤ និងឆ្នាំ១៩០៧ ខណៈកម្ពុជា​បាន​ប្រើ​ប្រាស់​ផែន​ទី​នេះ ដើម្បីដោះស្រាយជម្លោះ ប៉ុន្តែផ្ទុយទៅវិញ​ភាគី​ថៃ​បាន​ប្រើ​ប្រាស់​ផែន​ទី​ជា​ឯកតោ​ភាគី​ ដូច្នេះការប្រើប្រាស់ ផែនទីផ្ទុយគ្នា និងឯ​កសារ​មិន​ស៊ី​គ្នា​យ៉ាង​ដូច្នេះ​ជម្លោះ​អាច​នឹង​បន្ត​អូស​បន្លាយ​យូរ​។

យ៉ាងណាក៏ដោយសម្តេចមហារដ្ឋសភាធិបតី ឃួន សុដារី ក៏បានបញ្ជាក់អំពីជំហររបស់កម្ពុជាជាថ្មី ម្តង​ទៀត​ទៅកាន់ភាគីម៉ាឡេស៊ី និងពិភពលោកថា កម្ពុជានៅតែបន្ត​ដោះ​ស្រាយ​បញ្ហា​ព្រំដែន​នេះ​ដោយ​សន្តិវិធី និងប្រើប្រាស់យន្តការទ្វេភាគីដែលមានស្រាប់ ដូចជាកិច្ចប្រជុំGBC កិច្ចប្រជុំ JBC និង​កិច្ច​ប្រជុំRBC ជាដើម រួមទាំងផ្អែកទៅគោលការណ៍ច្បាប់អន្តរជាតិ អង្គការសហប្រជាជាតិ និង​ធម្ម​នុញ្ញអាស៊ានជាដើម។នៅក្នុងកិច្ចជំនួបនោះដែរ សម្តេចប្រធាន​រដ្ឋសភា​ក៏​បាន​ថ្លែង​អំណរ​គុណ​ចំពោះ​ម៉ាឡេស៊ី ដែលបាន ខិតខំស្វះស្វែងរកដំណោះស្រាយជម្លោះរវាងកម្ពុជា និងថៃផងដែរ។ 

ឯកឧត្តម​បណ្ឌិត Mohd Hatta បានថ្លែង​អំណរ​គុណ​យ៉ាង​ជ្រាល​ជ្រៅ​ចំពោះ​សម្តេច​មហា​រដ្ឋ​សភា​ធិប​តី​ ឃួន សុដារី ដែលបានចំណាយពេលវេលាដ៏មមាញឹកអនុញ្ញាតឱ្យរូបឯកឧត្តម និង​គណៈ​ប្រតិភូ​បាន​ចូលជួបសម្តែងការគួរសម និងពិភាក្សាការងារនាពេលនេះ។ ឯកឧត្តមបណ្ឌិត​បាន​សម្តែង​នូវក្តីសោមនស្សរីករាយ ដែលបានដឹកនាំ​គណៈ​ប្រតិភូ​សភាម៉ា​ឡេស៊ី​មក​បំពេញ​ទស្សន​កិច្ច​នៅ​កម្ពុជា​ ព្រមទាំងបានកត់សម្គាល់នូវការរីកចម្រើននៅកម្ពុជាផងដែរ៕ អត្ថបទ៖ បាន ចក់