ទេសាភិបាលធនាគារកណ្តាលជប៉ុន លោក Kazuo Ueda បានលើកឡើងនៅថ្ងៃសុក្រ (៣ តុលា) នេះថា អតិផរណាកំពុងស្ថិតលើផ្លូវឆ្ពោះទៅរកគោលដៅរបស់ធនាគារហើយ ប៉ុន្តែបានព្រមានខ្លាំងៗជាថ្មីម្ដងទឿតអំពីភាពមិនប្រាកដប្រជាផ្នែកសេដ្ឋកិច្ចទូទាំងពិភពលោក ដែលអាចរារាំងក្រុមហ៊ុនសកលមិនឱ្យដំឡើងប្រាក់ឈ្នួលដល់បុគ្គលិក និងបង្កភាពអាប់អួរដល់ចក្ខុវិស័យអត្រាការប្រាក់ក្នុងខែតុលានេះ។

លោក Ueda បានរំលឹកឡើងវិញនូវការតាំងចិត្តរបស់ធនាគារកណ្តាលជប៉ុន ក្នុងការបន្តដំឡើងអត្រាការប្រាក់ក្នុងកម្រិតទាប ប្រសិនបើសេដ្ឋកិច្ច និងតម្លៃទំនិញ ផ្លាស់ទីស្របតាមការព្យាកររបស់ខ្លួន។ យ៉ាងណាមិញ លោកក៏បាននិយាយថា មានភាពមិនច្បាស់លាស់ជាច្រើនជុំវិញចក្ខុវិស័យសេដ្ឋកិច្ចរបស់ជប៉ុន ដូចជាកំណើននៃភាពទន់ខ្សោយក្នុងទីផ្សារការងារសហរដ្ឋអាមេរិក និងផលប៉ះពាល់ដែលរំពឹងទុក នៃការដំឡើងពន្ធរបស់សហរដ្ឋអាមេរិក លើប្រាក់ចំណេញសាជីវកម្មជប៉ុន។

ក្នុងសុន្ទរកថាទៅកាន់មេដឹកនាំអាជីវកម្មនៅទីក្រុង Osaka ភាគខាងលិចជប៉ុន នៅថ្ងៃសុក្រនេះ លោក Ueda បាននិយាយថា "ដំណើរអនាគតនៃសេដ្ឋកិច្ចអាមេរិក និងការអនុវត្តន៍គោលនយោបាយរូបិយវត្ថុ អាចប៉ះពាល់ដល់សេដ្ឋកិច្ច និងតម្លៃរបស់ជប៉ុនយ៉ាងខ្លាំង ក៏ដូចជានៅទូទាំងសកលលោកផងដែរ"។

ការអត្ថាធិប្បាយនេះកើតឡើងបន្ទាប់ពីការបិទរដ្ឋាភិបាលសហរដ្ឋអាមេរិក កាលពីថ្ងៃពុធសប្ដាហ៍នេះ ដែលអាចពន្យារពេលការចេញផ្សាយទិន្នន័យសេដ្ឋកិច្ចមួយចំនួនធំ និងបង្កភាពស្មុគស្មាញកាន់តែខ្លាំងដល់ការសម្រេចចិត្តរឿងដំឡើងអត្រាការប្រាក់របស់ធនាគារកណ្ដាលជប៉ុន។ អ្នកលេងទីផ្សារកំពុងឃ្លាំមើលយ៉ាងដិតដល់នូវការអត្ថាធិប្បាយរបស់លោក Ueda សម្រាប់តម្រុយណាមួយពីអត្រាការប្រាក់ ដែលត្រូវបានផ្អាកដោយសារតែភាពមិនច្បាស់លាស់លើការធ្លាក់ចុះសេដ្ឋកិច្ច ជុំវិញពន្ធអាមេរិក៕