ក្រុមបាតុករដែលដឹកនាំដោយយុវជននៅក្នុងប្រទេសម៉ារ៉ុក បានចេញដើរតវ៉ាតាមដងផ្លូវទៀតហើយកាលពីថ្ងៃព្រហស្បតិ៍ (២ តុលា) នៅក្នុងយប់ទី៦ជាប់គ្នា បើទោះបីជាមានក្ដីបារម្ភថាអាចមានអំពើហិង្សាបន្ថែមទៀតក៏ដោយ បន្ទាប់ពីមនុស្ស ៣នាក់ បានស្លាប់ក្នុងបាតុកម្មកាលពីយប់ថ្ងៃពុធសប្ដាហ៍នេះ។

ក្រុមអ្នកតវ៉ាក្នុងរាប់សិបទីក្រុងទូទាំងប្រទេសម៉ារ៉ុក បានទាមទារកំណែទម្រង់យ៉ាងទូលំទូលាយ ដោយឱ្យមានសាលារៀន និងមន្ទីរពេទ្យកាន់តែប្រសើរជាងមុន ហើយអ្នកខ្លះបានអំពាវនាវឱ្យលោកនាយករដ្ឋមន្ត្រី Aziz Akhannouch លាលែងពីតំណែង។ ការអំពាវនាវឱ្យចុះពីតំណែងនេះ បានកើតឡើងបន្ទាប់ពីមានអ្នកស្លាប់ក្នុងការតវ៉ា ក្រោយការប៉ះទអ្គិចជាមួយនគរបាល ខណៈបាតុកម្មបែបសន្តិវិធីដ៏ធំបានប្រែទៅជាហិង្សាយ៉ាងកម្រោល ជាមួយនឹងការលួចប្លន់ធនាគារ និងដុតបំផ្លាញទ្រព្យសម្បត្តិជាច្រើន។

ក្រសួងមហាផ្ទៃម៉ារ៉ុក បាននិយាយថា ជនរងគ្រោះទាំងនោះ ត្រូវបានបាញ់សម្លាប់ ដោយសារតែពួកគេបានប៉ុនប៉ងលួចអាវុធរបស់នគរបាល ទោះបីជាមិនមានសាក្សីណាអាចបញ្ជាក់របាយការណ៍នេះបានក៏ដោយ ហើយមនុស្សរាប់រយនាក់ផ្សេងទៀតត្រូវបានចាប់ខ្លួន និងរងរបួស។

បាតុកម្មដែលរៀបចំឡើងដោយចលនា "GenZ 212" នោះ បានបញ្ឆេះឡើងដោយយុវជនតាមអ៊ីនធឺណិត ហើយមានអង្រួនប្រទេសម៉ារ៉ុក អស់រយៈពេលជាច្រើនថ្ងៃមកហើយ និងបានក្លាយជាបាតុកម្មធំបំផុតមួយរបស់ប្រទេសនេះក្នុងរយៈពេលជាច្រើនឆ្នាំកន្លងមក៕