អង្គការសហប្រជាជាតិកាលពីថ្ងៃព្រហស្បតិ៍ បានអំពាវនាវឲ្យមានចំណាត់ការបន្ទាន់ ដើម្បីទប់ស្កាត់ «ការវាយប្រហារទ្រង់ទ្រាយធំ ដែលដឹកនាំដោយជនជាតិភាគតិច និងអំពើឃោរឃៅ» នៅក្នុងទីក្រុង El-Fasher ភាគខាងលិចដែលត្រូវបានឡោមព័ទ្ធរបស់ប្រទេសស៊ូដង់។

ការអំពាវនាវពីការិយាល័យសិទ្ធិមនុស្សរបស់អង្គការសហប្រជាជាតិ បានធ្វើឡើង បន្ទាប់ពីមានសេចក្តីរាយការណ៍ថា យានដ្រូនរយៈចម្ងាយឆ្ងាយ កំពុងត្រូវបានដាក់ពង្រាយទុកមុន ដោយកងកម្លាំងយោធាគាំទ្ររហស័របស់ស៊ូដង់ នៅរដ្ឋ South Darfur ដោយបង្កើនការភ័យខ្លាចនៃការវាយប្រហារដ៏ធំមួយលើទីក្រុង El-Fasher ភាគខាងជើងនៃរដ្ឋ North Darfur នៅប៉ុន្មានថ្ងៃខាងមុខនេះ។

បច្ចុប្បន្ន កងកម្លាំងយោធាគាំទ្ររហ័ស កំពុងធ្វើការវាយលុកយ៉ាងខ្លាំងក្លាបំផុតរបស់ខ្លួន លើទីក្រុង El-Fasher ដែលជាទីក្រុងសំខាន់ចុងក្រោយ នៅក្នុងតំបន់ភាគខាងលិចដ៏ធំនៃរដ្ឋ Darfur ដែលនៅតែស្ថិតក្រោមការគ្រប់គ្រងរបស់កងទ័ពធម្មតារបស់ប្រទេសនេះ។

ប្រមុខសិទ្ធិមនុស្សរបស់អង្គការសហប្រជាជាតិ លោក Volker Turk បាននិយាយនៅក្នុងសេចក្តីថ្លែងការណ៍មួយថា៖«បន្ទាប់ពីការឡោមព័ទ្ធដោយឥតឈប់ឈរជាង ៥០០ថ្ងៃ ដោយកងកម្លាំង RSF និងការប្រយុទ្ធគ្នាឥតឈប់ឈរនៅទីក្រុង El-Fasher គឺស្ថិតក្នុងកម្រិតនៃគ្រោះមហន្តរាយកាន់តែខ្លាំង ប្រសិនបើវិធានការបន្ទាន់ មិនត្រូវបានចាត់ឡើង ដើម្បីកាត់បន្ថយឧក្រិដ្ឋកម្មប្រដាប់អាវុធលើទីក្រុង និងដើម្បីការពារជនស៊ីវិលនោះទេ»៕