នារសៀលថ្ងៃទី៣ ខែតុលា ឆ្នាំ២០២៥ ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានអញ្ជើញចូលរួមជាអធិបតីជាមួយ ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ ក្នុង "កិច្ចប្រជុំផ្សព្វផ្សាយច្បាប់ និងលិខិតបទដ្ឋានពាក់ព័ន្ធការស្នាក់នៅ និងការប្រើប្រាស់ជនបរទេសនៅក្នុងក្រុមហ៊ុន និងកាស៊ីណូក្នុងខេត្តព្រះសីហនុ" ។

កិច្ចប្រជុំនេះមានវត្តមានចូលរួមពីគណៈប្រតិភូ នៃអគ្គនាយកដ្ឋានអន្តោប្រវេសន៍ (ក្រុមប្រតិបត្តិការទី៣), ប្រធានមន្ទីរពាក់ព័ន្ធ, មេបញ្ជាការកងរាជអាវុធហត្ថ, តំណាងស្នងការដ្ឋាននគរបាលខេត្ត, លោកលោកស្រីជាមន្រ្តីរាជការនៃរដ្ឋបាលខេត្ត និងតំណាងក្រុមហ៊ុន កាស៊ីណូ រោងចក្រ សហគ្រាស សរុបចំនួន ៥៤០ នាក់។

គោលបំណង នៃកិច្ចប្រជុំ គឺដើម្បីផ្សព្វផ្សាយជាលើកទី២ ក្នុងឆ្នាំ២០២៥ ដល់ម្ចាស់ក្រុមហ៊ុន កាស៊ីណូ រោងចក្រ សហគ្រាស ឱ្យយកចិត្តទុកដាក់ខ្ពស់ក្នុងការគោរពច្បាប់ អនុវត្តតាមសេចក្តីណែនាំ និងលិខិតបទដ្ឋានពាក់ព័ន្ធនឹងការរាយការណ៍អំពីវត្តមានជនបរទេសដែលស្នាក់នៅ និងធ្វើការក្នុងទីតាំងរបស់ខ្លួន តាមរយៈការបំពេញព័ត៌មានជនបរទេសតាមគំរូរបាយការណ៍ស្វ័យប្រកាសរបស់មន្ទីរការងារ និងបណ្តុះបណ្តាលបណ្តាលវិជ្ជាជីវៈ ដោយធានាបាននូវចំនួនពិតប្រាកដ និងត្រឹមត្រូវ យ៉ាងយូរត្រឹមថ្ងៃទី១៣ ខែតុលា ឆ្នាំ២០២៥ និងការរាយការណ៍អំពីវត្តមានស្នាក់នៅរបស់ជនបរទេសដល់សមត្ថកិច្ចនគរបាលមូលដ្ឋានតាមរយៈប្រព័ន្ធ FPCS ស្របតាមច្បាប់ ស្តីពីអន្តោប្រវេសន៍។ 

ជាការសំណូមពរ ឯកឧត្តមគណៈអធិបតី បានស្នើ និងលើកទឹកចិត្តម្ចាស់ក្រុមហ៊ុន កាស៊ីណូ រោងចក្រ សហគ្រាសទាំងអស់ ឱ្យគោរពច្បាប់ និងអនុវត្តតាមសេចក្តីណែនាំ និងលិខិតដ្ឋានពាក់ព័ន្ធ ដើម្បីចូលរួមលើកកម្ពស់សន្តិសុខ និងសុវត្ថិភាពក្នុងខេត្ត ដោយមិនពាក់ព័ន្ធនឹងបទល្មើសគ្រឿងញៀន បទល្មើសជួញដូរ ឬបង្ខាំងមនុស្សឱ្យធ្វើការខុសច្បាប់ ជាដើម ។ល៕