រដ្ឋមន្ត្រីការបរទេសប៉ាគីស្ថាន លោក Ishaq Dar បាននិយាយនៅថ្ងៃសុក្រ (ទី៣ ខែតុលា) នេះថា ចំណុចទាំង២០ ដែលប្រធានាធិបតីអាមេរិក លោក Donald Trump បានប្រកាសក្នុងសប្តាហ៍នេះ ក្រោមផែនការរបស់លោក ក្នុងបំណងបញ្ចប់សង្រ្គាម នៅតំបន់ហ្កាហ្សា គឺមិនសមស្របនឹងសេចក្តីព្រាងដែលបង្ហាញជូនលោកដោយក្រុមប្រទេសកាន់សាសនាឥស្លាមភាគច្រើននោះទេ។

ក្រុមនេះបានស្នើឲ្យអ៊ីស្រាអែលដកទ័ពទាំងស្រុងចេញពីតំបន់ហ្កាហ្សា ក្នុងអំឡុងពេលមានកិច្ចប្រជុំ កាលពីថ្ងៃទី២២ ខែកញ្ញា ជាមួយលោក Trump ខណៈពេលដែលផែនការរបស់លោក រំពឹងពីការដកកងកម្លាំងរបស់អ៊ីស្រាអែលដោយផ្នែក ដើម្បីរៀបចំឲ្យមានការដោះលែងចំណាប់ថ្នូរនៅសល់ដែលត្រូវបានឃុំដោយពួកសកម្មប្រយុទ្ធហាម៉ាសប៉ាឡេស្ទីន។

លោក Dar បាននិយាយនៅក្នុងសុន្ទរកថាទៅកាន់សមាជិកសភាប៉ាគីស្ថានថា៖ «ខ្ញុំបានបញ្ជាក់យ៉ាងច្បាស់ថា ចំណុចទាំង ២០នេះ ដែលលោក Trump បានបង្ហាញជាសាធារណៈ គឺមិនដូចគ្នាទៅនឹងចំណុចរបស់យើងទេ។ ខ្ញុំសូមនិយាយថា ការកែប្រែខ្លះ ត្រូវបានធ្វើឡើង ពោលគឺនៅក្នុងសេចក្ដីព្រាង ដែលយើងមាន»។

កាលពីថ្ងៃចន្ទដើមសប្ដាហ៍នេះ លោក Trump បានបង្ហាញជាសាធារណៈនូវផែនការលម្អិតចំនួន ២០ចំណុច សម្រាប់ការបញ្ចប់សង្រ្គាម រវាងអ៊ីស្រាអែល និងក្រុមហាម៉ាស ដែលចំណាប់ថ្នូទាំងអស់ ពោលគឺទាំងរស់ និងស្លាប់ នឹងត្រូវប្រគល់មកវិញ ក្នុងរយៈពេល ៧២ម៉ោង បន្ទាប់ពីឈានដល់បទឈប់បាញ់។ ផែនការនោះសំដៅទៅតំបន់ «New Gaza» ដែលត្រូវបានអភិវឌ្ឍឡើងវិញ នាពេលអនាគត៕