បន្ទាយមានជ័យ៖ ប្រជាពលរដ្ឋខ្មែររស់នៅសហរដ្ឋអាមេរិក បានទៅលើកទឹកចិត្ត និង​នាំ​យក​អំណោយ​ផ្ដល់​ជូន​កងទ័ព និងប្រជាពលរដ្ឋខ្មែរនៅព្រំដែនកម្ពុជា-ថៃ ជាមួយនឹងការទៅមើលផ្ទាល់ ទីតាំងកន្លែងកងទ័ពថៃយកបន្លាលួសព័ទ្ធរំលោភយកដីខ្មែរ នៅភូមិព្រៃចាន់ ឃុំអូរបីជាន់ ស្រុកអូរជ្រៅ។

ក្នុងពេលមកដល់ភូមិព្រៃចាន់ នៅថ្ងៃទី៤ ខែតុលា ឆ្នាំ២០២៥ ពលរដ្ឋខ្មែរនៅសហរដ្ឋអាមេរិក បាន​បង្ហាញ​ការតក់ស្លុត និងឈឺចាប់យ៉ាងខ្លាំង ចំពោះទង្វើររបស់កងទ័ពថៃ ដែល​បាន​រំលោភ​បំពាន​ទឹក​ដី​កម្ពុជា​ធ្វើឲ្យប្រជាពលរដ្ឋខ្មែរភៀសសឹក ក៏ដូចជាអ្នកខ្លះដែលរស់នៅភូមិព្រៃចាន់ បាន​បាត់​បង់​ផ្ទះសម្បែង ហើយរស់នៅក្រោមដំបូលតង់ ។

ជាមួយនេះ ពួកគេបានសម្ដែងនូវការគាំទ្ររាជរដ្ឋាភិបាលកម្ពុជានូវរាល់ដំណោះស្រាយនានា ដោយ​សន្តិវិធីបញ្ចៀសការបង្ហូរឈាម ក៏ដូចជាអំពាវនាវដល់សហគមន៍អន្តរជាតិ ជួយ​ដោះ​ស្រាយ​ឲ្យ​បាន​ទាន់​ពេលវេលា ព្រោះថាកម្ពុជាត្រូវការសុខសន្តិភាព មិនត្រូវការសង្គ្រាមជាដាច់ខាត។

គួរបញ្ជាក់ថា គិតត្រឹមល្ងាចថ្ងៃទី៤ ខែតុលា ឆ្នាំ២០២៥នេះ ស្ថានភាពនៅភូមិព្រៃចាន់ និង​ភូមិ​ជោគ​ជ័យ ឃុំអូរបីជាន់ មិនមានអ្វីកើតឡើងគួរឲ្យកត់សម្គាល់នោះទេ ក្រៅ​ពី​មាន​ប្រជា​ពលរដ្ឋ​ពី​គ្រប់​ទិសទី ទៅលើទឹកចិត្ត ផ្ដល់អំណោយដល់កងទ័ព និងប្រជាពលរដ្ឋ ខណៈ​កងទ័ព​កម្ពុជា​កំពុង​តាម​ដាន​ និងឈរការពារបូរណភាពទឹកដី ប្រកបដោយស្មារតីមុះមុត និងអង់អាចក្លាហាន៕ អត្ថបទ បាន សុខរិទ្ធិ