ប្រធានាធិបតីរុស្ស៊ី លោក Vladimir Putin បាននិយាយថា ប្រសិនបើសហរដ្ឋអាមេរិក ផ្គត់ផ្គង់មីស៊ីលតម្រង់គោលដៅ Tomahawk រយៈចម្ងាយឆ្ងាយឱ្យដល់អ៊ុយក្រែន សម្រាប់ការវាយប្រហារជ្រៅក្នុងទឹកដីសរុស្ស៊ី នោះនឹងបំផ្លាញទំនាក់ទំនងរបស់ទីក្រុងមូស្គូ ជាមួយទីក្រុងវ៉ាស៊ីនតោន។

រយៈពេលតិចជាងពីរខែចាប់តាំងពីលោកប្រធានាធិបតីអាមេរិក Donald Trump បានជួបជាមួយលោក Putin ក្នុងកិច្ចប្រជុំកំពូលរដ្ឋអាឡាស្កា សន្តិភាពអ៊ុយក្រែនមើលទៅកាន់តែឆ្ងាយជាងមុន ដោយកងកម្លាំងរុស្ស៊ី កំពុងវាយរុលក្នុងទឹកដីអ៊ុយក្រែន ចំណែកយានដ្រូនរបស់រុស្ស៊ី ត្រូវចោទថាបំពានដែនអាកាសណាតូ ហើយឥឡូវនេះ ទីក្រុងវ៉ាស៊ីនតោន កំពុងនិយាយពីការចូលរួមដោយផ្ទាល់ក្នុងការវាយប្រហារជ្រៅក្នុងទឹកដីមហាអំណាចនុយក្លេអ៊ែរដ៏ធំបំផុតមួយរបស់ពិភពលោក។

លោក Trump និយាយថា លោកខកចិត្តចំពោះលោក Putin ណាស់ ដែលមិនព្រមបង្កើតសន្តិភាព ហើយចាត់ទុករុស្ស៊ី ថាជា «ខ្លាក្រដាស» ដោយសារបរាជ័យក្នុងការបង្ក្រាបអ៊ុយក្រែន។ លោក Putin កាលពីសប្តាហ៍មុន បានវាយបកវិញ ដោយចោទសួរថា តើណាតូ មិនមែនជា "ខ្លាក្រដាស" ទេឬ សម្រាប់ការបរាជ័យមិនអាចបញ្ឈប់ការវាយរុលរបស់រុស្ស៊ីបាន។

អនុប្រធានាធិបតីអាមេរិក លោក JD Vance វិញបាននិយាយកាលពីខែមុនថា ទីក្រុងវ៉ាស៊ីនតោន កំពុងពិចារណាលើសំណើរបស់អ៊ុយក្រែន ដើម្បីទទួលបានមីស៊ីល Tomahawk ដែលអាចវាយប្រហារជ្រៅទៅក្នុងរុស្ស៊ី រួមទាំងទីក្រុងមូស្គូផងដែរ ប៉ុន្តែការសម្រេចចិត្តចុងក្រោយមិនទាន់ត្រូវធ្វើឡើងនោះទេ។

ក្នុងឃ្លីបវីដេអូមួយដែលចេញផ្សាយនៅថ្ងៃអាទិត្យ (៥ តុលា) នេះ ដោយអ្នកយកព័ត៌មានទូរទស្សន៍រដ្ឋរុស្ស៊ី បានបង្ហាញរូបភាពលោក Putin ដែលនិយាយទាក់ទងនឹងការឱ្យមីស៊ីល Tomahawk ទៅអ៊ុយក្រែនថា "ចំណុចនេះនឹងនាំឱ្យមានការបំផ្លាញទំនាក់ទំនងរបស់រុស្ស៊ី-អាមេរិក ឬនិន្នាការវិជ្ជមានទាំងឡាយដែលបានលេចឡើងនៅក្នុងទំនាក់ទំនងទាំងនេះ"៕