ក្រុមអាជ្ញាធរឥណ្ឌូនេស៊ីបានបញ្ជាក់កាលពីយប់ថ្ងៃអាទិត្យថា សាកសពចំនួន៤៩ នាក់ត្រូវបានរកឃើញពីគំនរបាក់បែកនៃអគារ Pondok Pesantren Al Khoziny ដែលជាសាលាររៀនមួយស្ថិតក្នុងទីក្រុង Sidoarjo ខេត្តជ្វាខាងកើត មួយសប្តាហ៍បន្ទាប់ពីអគារនេះបានបាក់រលំ និងកប់សិស្សជាង១៤០នាក់ ដែលកំពុងចូលរួមពិធីបួងសួងនៅជាន់ផ្ទាល់ដី។

ទីភ្នាក់ងារកាត់បន្ថយគ្រោះមហន្តរាយជាតិ (BNPB) បាននិយាយថា ចំនួនអ្នកស្លាប់បានកើនឡើងយ៉ាងខ្លាំង បន្ទាប់ពីក្រុមអ្នកជួយសង្រ្គោះបានចាប់ផ្តើមប្រើប្រាស់គ្រឿងចក្រធុនធ្ងន់ រួមទាំងឧបករណ៍បំបែកបេតុង និងម៉ាស៊ីនអេស្កាវ៉ាទ័រ ដើម្បីជីកជ្រៅទៅក្នុងកម្ទេចកម្ទី ដែលចាប់ផ្តើមពីថ្ងៃទី ២ ខែតុលា។ ក្រុមជួយសង្គ្រោះបានពឹងផ្អែកលើឧបករណ៍រាវរកសំឡេង និងកម្តៅ ដែលបង្ហាញថាគ្មានសញ្ញានៃអ្នកនៅរស់រានមានជីវិត នៅក្រោមគំនរបាក់បែក នៅថ្ងៃទី ៤ បន្ទាប់ពីការបាក់រលំនោះទេ។ 

លោក Abdul Muhari ប្រធានមជ្ឈមណ្ឌលទិន្នន័យ ព័ត៌មាន និងគ្រោះមហន្តរាយរបស់ទីភ្នាក់ងារកាត់បន្ថយគ្រោះមហន្តរាយជាតិខាងលើ បាននិយាយក្នុងសេចក្តីថ្លែងការណ៍ជាលាយលក្ខណ៍អក្សរថាការរកឃើញសាកសពនីមួយៗបានបញ្ចប់ភាពអន្ទះសាររបស់ក្រុមគ្រួសារដែលរង់ចាំចម្លើយ ។

កាលពីថ្ងៃអាទិត្យតែមួយថ្ងៃ ជនរងគ្រោះចំនួន ២១ នាក់ត្រូវបានរកឃើញ ជាចំនួនប្រចាំថ្ងៃខ្ពស់បំផុតចាប់តាំងពីការស្វែងរកបានចាប់ផ្តើម។ ការសង្គ្រោះកាលពីកន្លងទៅថ្មីៗ រួមមានការរកឃើញសាកសពបីនាក់ កាលពីថ្ងៃពុធ ពីរនាក់ កាលពីថ្ងៃព្រហស្បតិ៍ ៩នាក់ កាលពីថ្ងៃសុក្រ និង១១នាក់ កាលពីថ្ងៃសៅរ៍៕