លោកប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃអាទិត្យថា ប្រទេសរុស្ស៊ីបានបើកការវាយប្រហារដោយយានដ្រូនជិត៥០០គ្រឿង ចូលទៅក្នុងប្រទេសនេះ ពេញមួយយប់នៅក្នុងការលុកលុយពីចម្ងាយចុងក្រោយបង្អស់របស់ទីក្រុងមូស្គូ។

លោក Zelenskyy បាននិយាយថា មនុស្សយ៉ាងហោចណាស់៥នាក់បានស្លាប់ និង១០នាក់រងរបួសនៅទូទាំងប្រទេសអ៊ុយក្រែន។ លោកប្រធានាធិបតីបានសរសេរនៅក្នុងសារ Telegram ថាផលប៉ះពាល់ត្រូវបានរាយការណ៍នៅក្នុងតំបន់ Lviv, Ivano-Frankivsk, Zaporizhzhia, Chernihiv, Sumy, Kharkiv, Kherson, Odesa និង តំបន់ Kirovohrad ។   

កងទ័ពអាកាសរបស់អ៊ុយក្រែនបាននិយាយថា រុស្ស៊ីបានបាញ់បង្ហោះយានដ្រូនចំនួន ៤៩៦ គ្រឿង និងមីស៊ីលប្រភេទផ្សេងៗចំនួន ៥៣ គ្រាប់។ កងកម្លាំងអាកាសបាននិយាយថា ក្រុមអ្នកការពារបានបាញ់ទម្លាក់ ឬបង្ក្រាបយានដ្រូនចំនួន៤៣៩ គ្រឿង និងមីស៊ីលចំនួន៣៩ គ្រាប់ ដោយមានមីស៊ីលចំនួន ៨គ្រាប់ ផ្សេងទៀតមិនបានទៅដល់គោលដៅទេ។      

កងកម្លាំងអាកាសបាននិយាយថា មីស៊ីលចំនួន ៨គ្រាប់ និងយានដ្រូនចំនួន៥៧ គ្រឿងបានប៉ះពាល់ដល់ទីតាំងចំនួន២០ ហើយ ត្រូវបានរាយការណ៍ថាកម្ទេចកម្ទី បានធ្លាក់នៅទីតាំងចំនួន ៦ ។

លោក Zelenskyy បាននិយាយថា ថ្ងៃនេះរុស្ស៊ីបានវាយលុកម្តងទៀតលើហេដ្ឋារចនាសម្ព័ន្ធរបស់យើង អ្វីគ្រប់យ៉ាងដែលធានាបាននូវជីវិតធម្មតាសម្រាប់មនុស្ស។  

ការវាយប្រហារទាំងនេះ ត្រូវបានផ្ដោតលើភាគខាងលិចអ៊ុយក្រែន។ នៅក្នុងទីក្រុង Lviv ជិតព្រំដែនប៉ូឡូញ មនុស្សយ៉ាងហោចណាស់ ៤នាក់បានស្លាប់ និង៤នាក់ផ្សេងទៀតរងរបួស នេះបើយោងតាមសេវាសង្គ្រោះបន្ទាន់រដ្ឋអ៊ុយក្រែន (DSNS)៕