ប្រធានាធិបតីប្រទេសម៉ាដាហ្គាស្ការ លោក Andry Rajoelina បានតែងតាំងលោក Ruphin Fortunat Zafisambo ជានាយករដ្ឋមន្ត្រី ខណៈការតវ៉ាប្រឆាំងរដ្ឋាភិបាលបានផ្ទុះឡើងម្តងទៀតនៅក្នុងប្រទេសនេះ។ ការតែងតាំងលោក Zafisambo ដែលជាឧត្តមសេនីយយោធាកាលពីថ្ងៃចន្ទ ធ្វើឡើងមួយសប្តាហ៍បន្ទាប់ពីរដ្ឋាភិបាលត្រូវបានរំលាយក្នុងការឆ្លើយតបទៅនឹងការតវ៉ា។

ទោះជាយ៉ាងណា ពេលនេះក្រុមអ្នកតវ៉ាកំពុងអំពាវនាវឲ្យលោក Rajoelina ខ្លួនលោកផ្ទាល់លាលែងពីតំណែង។ នគរបាលបានបាញ់ឧស្ម័នបង្ហៀរទឹកភ្នែកទៅលើក្រុមបាតុករនៅតាមដងផ្លូវនៃរដ្ឋធានី Antananarivo កាលពីថ្ងៃចន្ទ ជាការចាប់ផ្តើមនៃការតវ៉ាសប្តាហ៍ទីបីជាប់ៗគ្នា។ ភាពវឹកវរបានចាប់ផ្តើមដោយសារតែការកាត់ផ្តាច់ទឹក និងអគ្គិសនី ប៉ុន្តែបានវិវត្តន៍ទៅជាកំហឹងប្រឆាំងរដ្ឋាភិបាលកាន់តែទូលំទូលាយប្រឆាំងរដ្ឋបាលរបស់ លោក Rajoelina ។

ក្រុមបាតុករ បានមកប្រមូលផ្តុំគ្នានៅក្នុងទីក្រុងនានានៅទូទាំងប្រទេស ដោយស្ថានីយ៍ទូរទស្សន៍ក្នុងស្រុកបានចាក់ផ្សាយបង្ហាញពីប្រជាជននៅកន្លែងប្រមូលផ្តុំគ្នា ត្រូវប្រឈមមុខជាមួយនគរបាលក្នុងទីក្រុង Toliara និងទីក្រុង Antsiranana ។

អង្គការសហប្រជាជាតិបាននិយាយកាលពីថ្ងៃចន្ទថាមនុស្ស២២នាក់ត្រូវបានសម្លាប់ចាប់តាំងពីការតវ៉ាបានចាប់ផ្តើម ហើយមនុស្សជាង១០០នាក់បានរងរបួស ជាតួលេខដែលត្រូវបានច្រានចោលដោយរដ្ឋាភិបាល។