ប្រជាជននៅទីក្រុងឈីកាហ្គោ មានការខ្វែងគំនិតគ្នាជុំវិញការឆ្មក់បង្ក្រាបដែលកំពុងនៅបន្តរបស់កងកម្លាំងអនុវត្តច្បាប់គយនិងអន្តោប្រវេសន៍សហរដ្ឋអាមេរិក (ICE) ដែលកើតឡើងនៅក្នុង និងជុំវិញទីក្រុងធំបំផុតទី៣របស់ប្រទេសមួយនេះ ព្រមទាំងផែនការរបស់ប្រធានាធិបតី លោក Donald Trump ក្នុងការដាក់ពង្រាយឆ្មាំជាតិ។

លោក Kevin Guano ជនជាតិអេក្វាឌ័រអាយុ២០ ឆ្នាំដែលបានផ្លាស់ទៅទីក្រុង Chicago កាលពីប្រាំខែមុនបាននិយាយកាលពីថ្ងៃចន្ទ ទី៦ តុលា ថា «វាជាការរើសអើងជាតិសាសន៍»។ «ខ្ញុំស្រលាញ់ប្រទេសនេះ ខ្ញុំស្រលាញ់ទីក្រុងឈីកាហ្គោ ប៉ុន្តែខ្ញុំគិតថា ការសម្រេចចិត្តរបស់លោក Trump ពុំមែនជាការល្អទេ ព្រោះខ្ញុំបានសិក្សាប្រវត្តិសាស្រ្តរបស់ប្រទេស ហើយខ្ញុំដឹងថាទីក្រុងឈីកាហ្គោ ដូចជាទីក្រុងសម្រាប់ជនអន្តោប្រវេសន៍។ ដូច្នេះ វាជាអ្វីដែលផ្ទុយនឹងការនិយាយ ឬធ្វើការឃោសនាអំពី «ជនអន្តោប្រវេសន៍ សុទ្ធតែអាក្រក់»ឬថាពួកគេបំផ្លាញប្រទេស។ អ្នកផ្សេងទៀតបានមកស្វាគមន៍ កងកម្លាំង ICE និងឆ្មាំជាតិដោយសង្ឃឹមថាវត្តមានរបស់ពួកគេនឹងទប់ស្កាត់ឧក្រិដ្ឋកម្មនៅទីក្រុងឈីការហ្គោ។ «ខ្ញុំមានអារម្មណ៍ថាដូចជាទីក្រុងឈីកាហ្គោ ពិតជាមានអំពើហិង្សានៅគ្រប់សង្កាត់ សូម្បីតែទីប្រជុំជន»។

រដ្ឋ Illinois បានចាប់ផ្តើមការប្រឈមផ្លូវច្បាប់កាលពីថ្ងៃចន្ទ (ទី៦ ខែតុលា) ដើម្បីរារាំងប្រធានាធិបតីសហរដ្ឋអាមេរិកលោក Donald Trump ពីការដាក់ពង្រាយកងទ័ពឆ្មាំជាតិសហព័ន្ធរាប់រយនាក់ទៅកាន់ផ្លូវនៃទីក្រុងឈីកាហ្គោ ជាចំណុចចុងក្រោយបំផុតនៅក្នុងការតតាំងគ្នារបស់តុលាការដែលកំពុងកើនឡើងជុំវិញសិទ្ធិអំណាចរបស់ប្រធានាធិបតីគណបក្សសាធារណរដ្ឋក្នុងការដាក់ពង្រាយកងកម្លាំងយោធាក្នុងស្រុក។