ប្រធានធនាគារកណ្តាលអឺរ៉ុប ECB លោកស្រី Christine Lagarde បានលើកឡើងកាលពីថ្ងៃចន្ទ (៦ តុលា) ថា ការសម្រេចចិត្តណាមួយរបស់សហភាពអឺរ៉ុប ស្តីពីការប្រើប្រាស់ទ្រព្យសម្បត្តិរដ្ឋដែលត្រូវបានបង្កករបស់រុស្ស៊ី ដើម្បីយកទៅជួយអ៊ុយក្រែន ត្រូវតែអនុវត្តតាមច្បាប់អន្តរជាតិ ហើយ ECB "យកចិត្តទុកដាក់យ៉ាងខ្លាំង" ចំពោះដំណើរការនេះ។

ប្លុកអឺរ៉ុប កំពុងស្វែងរកមធ្យោបាយផ្តល់ហិរញ្ញប្បទានដល់វិស័យការពារជាតិ និងការកសាងឡើងវិញរបស់អ៊ុយក្រែន ជាមួយនឹងទ្រព្យសម្បត្តិអធិបតេយ្យភាពរុស្ស៊ី ដែលមានតម្លៃប្រមាណ ២១០ពាន់លានអឺរ៉ូ ដែលត្រូវបានបង្កកនៅលោកខាងលិច បន្ទាប់ពីប្រតិបត្តិការយោធារបស់ទីក្រុងមូស្គូ លើអ៊ុយក្រែន ក្នុងឆ្នាំ២០២២។

ដោយសារការរឹបអូសទាំងស្រុងនឹងខុសច្បាប់ ថ្នាក់ដឹកនាំនយោបាយរបស់ប្លុកនេះកំពុងធ្វើការលើផែនការវិនិយោគសាច់ប្រាក់រុស្ស៊ីទៅក្នុងបណ្ណបំណុលដែលចេញដោយគណៈកម្មការអឺរ៉ុប ជាមួយនឹងការធានាពីរដ្ឋាភិបាលសហភាពអឺរ៉ុប។ បន្ទាប់មក EU នឹងប្រើប្រាស់សាច់ប្រាក់ទាំងនេះដើម្បីចេញ "ឥណទានគ្មានការប្រាក់" ដល់អ៊ុយក្រែន។

លោកស្រី Lagarde បានប្រាប់សមាជិកសភាអឺរ៉ុបថា "ECB រំពឹងយ៉ាងខ្លាំងថា គម្រោងណាមួយដែលត្រូវពិភាក្សា និងដាក់ចេញនៅចំណុចណាមួយ ក្នុងពេលណាមួយ នឹងត្រូវធ្វើឡើងស្របតាមច្បាប់អន្តរជាតិ ជាមួយនឹងច្បាប់អន្តរជាតិ"។ ប្រមុខធនាគារកណ្ដាលរូបនេះបារម្ភថា ចំណាត់ការដ៏ចម្រូងចម្រាសផ្លូវច្បាប់តបមកវិញ នឹងធ្វើឱ្យខូចដល់ភាពជឿជាក់នៃប្រាក់អឺរ៉ូ និងបង្អាក់វិនិយោគិនពីការកាន់កាប់ទ្រព្យសកម្មប្រាក់អឺរ៉ូ ដែលអាចធ្វើឱ្យប៉ះពាល់ដល់ស្ថិរភាពហិរញ្ញវត្ថុទ្វីបទាំងមូល៕