ទីភ្នាក់ងារស្ទាបស្ទង់ភូគព្ភសាស្ត្រអាមេរិក (USGS) បានឲ្យដឹងថា រញ្ជួយដីកម្រិត ៦,៦រ៉ិចទ័រ បានកើតមាននៅក្បែរទីក្រុង Lae ដែលជាទីក្រុងធំទី២ របស់ប្រទេសប៉ាពួញូវហ្គីណេ នៅថ្ងៃអង្គារ (ទី៧ ខែតុលា) នេះ។

មន្ត្រីនគរបាលក្រុង លោកស្រី Mildred Ongige បានប្រាប់សារព័ត៌មានរ៉យទ័រតាមទូរសព្ទថា រញ្ជួយដី «ដ៏ខ្លាំង» មួយ បានកើតឡើង។ លោកស្រីបានបន្ថែមថា៖ «វាគឺកើតមាននៅប៉ុន្មាននាទីមុននេះ។ ហេតុដូច្នេះ យើងមិនមានព័ត៌មានលម្អិតបន្ថែមទៀត អំពីការខូចខាតនោះទេ ប៉ុន្តែយើងមានការព្រួយបារម្ភណាស់»។

ភ្លាមៗនេះ មិនទាន់មានសេចក្តីរាយការណ៍ អំពីការខូចខាតនៅឡើយទេ។ ហើយបើយោងតាមមជ្ឈមណ្ឌលព្រមានរលកយក្សស៊ូណាមិប៉ាស៊ីហ្វិក បានឲ្យដឹង ការព្រមាន អំពីរលកយក្សស៊ូណាមិ មិនត្រូវបានចេញទេ បន្ទាប់ពីមានរញ្ជួយដីដែលបានកើតឡើងក្នុងជម្រៅ ១០គីឡូម៉ែត្រនេះ។

យោងតាម USGS បានឲ្យដឹងថា ចំណុចកណ្តាលនៃការរញ្ជួយនេះ មានចម្ងាយ ២៦គីឡូម៉ែត្រ ពីទីក្រុង Lae ជាទីដែលមានប្រជាជនជាង ៧៦.០០០នាក់រស់នៅ និងមានទីតាំងនៅក្នុងខេត្ត Morobe របស់ប្រទេស។

ការរញ្ជួយដីនេះត្រូវបានរាយការណ៍ដំបូង ក្នុងកម្រិត ៦,៨រ៉ិចទ័រ ដោយមជ្ឈមណ្ឌលស្រាវជ្រាវភូមិសាស្ត្រអាល្លឺម៉ង់ (GFZ) មុនពេលទីភ្នាក់ងារនេះ បានកែប្រែមកត្រឹមកម្រិត ៦,៦រ៉ិចទ័រវិញ៕