តំបន់ជាច្រើនរបស់ប្រទេសរុស្ស៊ី កំពុងបង្កើនយ៉ាងខ្លាំងនូវចំនួនទឹកប្រាក់ដែលពួកគេបង់ឱ្យអ្នកចូលបម្រើយោធាថ្មី ខណៈក្រុមអ្នកវិភាគនិយាយថា យុទ្ធនាការជ្រើសរើសបុគ្គលិកយោធា "បែបមនោគមវិជ្ជា" លែងមានប្រសិទ្ធភាពទៀតហើយដើម្បីជំរុញប្រជាជនឱ្យប្រយុទ្ធនៅអ៊ុយក្រែន។

តំបន់ជាច្រើនរបស់រុស្ស៊ី បានប្រកាសក្នុងរយៈពេលប៉ុន្មានថ្ងៃថ្មីៗនេះថា ពួកគេនឹងបង្កើនប្រាក់រង្វាន់ចំនួនដល់ទៅ ៤ដង នៃការចុះឈ្មោះធ្វើទាហាន ក្នុងកិច្ចប្រឹងប្រែងមួយដើម្បីបង្កើនចំនួនបុគ្គលិករបស់ពួកគេ។

រដ្ឋាភិបាលនៃតំបន់ Tyumen នៅស៊ីបេរី បាននិយាយកាលពីថ្ងៃចន្ទសប្ដាហ៍នេះថា ខ្លួននឹងបង់ប្រាក់ឱ្យអ្នកចូលធ្វើទាហានថ្មីចំនួន ៣លានរូប្លិ៍ (៣៦.៥៦០ដុល្លារអាមេរិក) បន្ថែមពីលើប្រាក់ ៤សែនរូប្លិ៍ ដែលពួកគេទទួលបានពីរដ្ឋាភិបាលសហព័ន្ធ - ដរាបណាអ្នកទាំងនោះចុះឈ្មោះមុនដំណាច់ខែវិច្ឆិកា។

របាយការណ៍ព័ត៌មានបានឱ្យដឹងថា រុស្សីខាតបង់យ៉ាងសម្បើមក្នុងសង្រ្គាមលើអ៊ុយក្រែន ដោយមានការប៉ាន់ប្រមាណថា ទាហានរុស្ស៊ី ១លាននាក់ ត្រូវបានសម្លាប់ ឬរងរបួស ចាប់តាំងពីការចាប់ផ្តើមនៃប្រតិបត្តិការយោធាពិសេសកាលពី ៣ឆ្នាំមុនមក។

រដ្ឋមន្ត្រីការពារជាតិរុស្ស៊ី លោក Andrey Belousov បានដាក់ការជ្រើសរើសបុគ្គលិកជាចំណុចសំខាន់មួយក្នុងចំណោមអាទិភាពកំពូលរបស់យោធា ក្នុងអំឡុងកិច្ចប្រជុំការពារជាតិកម្រិតខ្ពស់កាលពីខែសីហាកន្លងទៅ ដោយសង្កត់ធ្ងន់ថា កម្លាំងទ័ពគឺជា "គន្លឹះសម្រាប់គាំទ្រដល់ប្រតិបត្តិការវាយលុក"។

លោក Belousov បានអះអាងថា គោលដៅជ្រើសរើសបុគ្គលិកកំពុងត្រូវបានបំពេញ ប៉ុន្តែបណ្តាញស៊ើបអង្កេតឯករាជ្យរបស់រុស្ស៊ី IStories បានរាយការណ៍ផ្អែកលើទិន្នន័យនៃការចំណាយថវិកាផ្លូវការថា មនុស្សប្រហែល ៣៧.៩០០នាក់ បានចុះហត្ថលេខាលើកិច្ចសន្យាជាមួយក្រសួងការពារជាតិនៅក្នុងត្រីមាសទីពីរនៃឆ្នាំ២០២៥នេះ ដែលជាចំនួនតិចជាងពីរដងកន្លះ កាលពីឆ្នាំមុន៕