សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានរំពឹងថា កិច្ចប្រជុំគណៈកម្មការចំរុះព្រំដែនកម្ពុជា និងថៃ ដែលហៅកាត់ថាJBC នឹងប្រព្រឹត្តិទៅនាពេលឆាប់ៗខាងមុខនេះ ដើម្បីដោះស្រាយបញ្ហានៅតាមព្រំ ដែនកម្ពុជា-ថៃ ជាពិសេសនៅតំបន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យប្រទេសកម្ពុជាទល់មុខភូមិណងចាន់ ស្រុកខូកស៊ូង ខេត្តស្រះកែវ ព្រះរាជាណាចក្រថៃ ខណៈការខកខានមិនបានប្រជុំកន្លងមក នេះដោយមូលហេតុរង់ចាំការរៀបចំសមាសភាពថ្មីរបស់ JBC ខាងភាគីថៃ។

តាមរយៈបណ្តាញសង្គមហ្វេសបុក និងឆាណែលតេលេក្រាម នារសៀលថ្ងៃទី៨ ខែតុលា ឆ្នាំ ២០២៥​នេះ សម្តេចធិបតី នាយករដ្ឋមន្រ្តី បានរំលឹកថា កំណត់ហេតុ​ព្រម​ព្រៀង​កិច្ច​ប្រជុំ​ពិសេស​លើក​ទី១ នៃគណៈកម្មាធិការព្រំដែនទូទៅ កម្ពុជា-ថៃ នាថ្ងៃទី១០ ខែកញ្ញា ឆ្នាំ២០២៥ នៅ​ខេត្ត​កោះកុង ព្រះរាជាណាចក្រកម្ពុជា ចុះហត្ថលេខាដោយឯកឧត្តម នាយឧត្តមសេនីយ៍ ទៀ សីហា ឧប​នាយករដ្ឋមន្ត្រី រដ្ឋមន្ត្រីការពារជាតិកម្ពុជា និង ឯកឧត្តមនាយឧត្តមសេនីយ៍ Nattaphon Narkphanit រដ្ឋមន្ត្រីស្តីទីនៃក្រសួងការពារជាតិថៃ បានបញ្ជាក់យ៉ាងច្បាស់ថា បញ្ហា​ទាក់​ទង​នឹង​ការ​គ្រប់​គ្រងព្រំដែន ជាពិសេសពាក់ព័ន្ធនឹងឧបទ្វវហេតុនៅក្នុងតំបន់ភូមិជោគជ័យ ឃុំអូរបីជាន់ ស្រុក​អូរជ្រៅ ខេត្តបន្ទាយមានជ័យ ព្រះរាជាណាចក្រកម្ពុជា ទល់មុខភូមិណងចាន់ ស្រុកខូកស៊ូង ខេត្ត​ស្រះកែវ ព្រះរាជាណាចក្រថៃ ភាគីទាំងពីរបានទទួលស្គាល់ថា គណៈកម្មការចំរុះព្រំដែន (JBC) ជាយន្តការដោះស្រាយបញ្ហាដែលទាក់ទងនឹងការវាស់វែងរួម និងខ័ណ្ឌសីមាព្រំដែន ព្រម​ទាំង​បានឯកភាពដាក់បញ្ហានេះជារបៀបវារៈអាទិភាព នៅកិច្ចប្រជុំ​បន្ទាប់​របស់​គណៈកម្មការ​ចំរុះ​ព្រំដែន ​(JBC) ហើយភាគីទាំង​ពីរ​បាន​ប្រគល់​ភារកិច្ច​ដល់​គណៈកម្មការ​ធិការ​ព្រំដែន​ថ្នាក់​យោធ​ភូមិ​ភាគ (RBC) ដើម្បីពិភាក្សាអំពីការគ្រប់គ្រងបញ្ហានេះឱ្យបានឆាប់បំផុត ស្របតាម​លទ្ធផល​នៃ​កិច្ច​ពិភាក្សា​របស់គណៈកម្មការចំរុះព្រំដែន (JBC)។

ទោះជាយ៉ាងណាក៏ដោយ សម្តេចធិបតី នាយករដ្ឋមន្រ្តីនៃកម្ពុជា បានបញ្ជាក់​ថា​«កា​រ​ខក​ខាន​ប្រជុំ​គណៈ​កម្មការ​ចម្រុះព្រំដែន (JBC) ចាប់តាំងពីខែ កញ្ញាឆ្នាំ ២០២៥ កន្លងទៅនេះ ដោយ​មូល​ហេតុ​រង់​ចាំកា​រ​រៀបចំ​សមាសភាពថ្មីរបស់ JBC ខាងភាគីថៃ»។ សម្តេចធិបតីបានថ្លែងទៀតថា« កម្ពុជា​សង្ឃឹមថានឹងមានកិច្ចប្រជុំ JBC ក្នុងពេលឆាប់ៗខាងមុខដើម្បីដោះស្រាយបញ្ហានេះ»៕ អត្ថបទ៖ បាន ចក់