បាល់ទាត់៖ បន្ទាប់ពីសេណេហ្កាល់បានកក់កៅអីនៅវគ្គផ្តាច់ព្រ័ត្របាល់ទាត់ជើងឯកទ្វីបអាហ្វ្រិក Africa Cup of Nations វគ្គពាក់កណ្តាលផ្តាច់ព្រ័ត្រមួយគូទៀតរាត្រីនេះរវាងអធិរាជបាល់ទាត់ទ្វីបអាហ្វ្រិកទាំងពីរកាមេរូន និងអេហ្ស៊ីបនឹងមានតែមួយប៉ុណ្ណោះឡើងវគ្គផ្តាច់ព្រ័ត្រ។ អេហ្ស៊ីបដែលធ្លាប់ឈ្នះជើងឯក Africa Cup of Nations នេះច្រើនជាងគេដល់ទៅ ៧លើកកំពុងសំឡឹងស្វែងរកជើងឯកបន្ថែមទៀតដើម្បីពន្លាតកំណត់ត្រារបស់ខ្លួន ខណៈម្ចាស់ផ្ទះកាមេរូនដែលធ្លាប់ឈ្នះ ៥លើកក៏ស្រែកឃ្លានជ័យជំនះក្នុងនាមជាក្រុមម្ចាស់ផ្ទះផងដែរ។
អេហ្ស៊ីបមិនមានកីឡាកររបួសឡើយមុនការប្រកួតរាត្រីនេះ ខណៈខ្សែប្រយុទ្ធ Liverpool, Mohamed Salah បានដឹកនាំមិត្តរួមក្រុមហ្វឹកហាត់ត្រៀមចុងក្រោយនៅថ្ងៃពុធម្សិលមិញ។ អេហ្ស៊ីបឡើងមកដល់វគ្គនេះក្នុងនាមជាក្រុមលេខ ២ ប៉ុណ្ណោះនៅក្នុងពូល D ពីក្រោមនីហ្សេរីយ៉ា និងឡើងមកដល់វគ្គ ១៦ក្រុមចុងក្រោយយកឈ្នះក្រុមជើងឯកពីរសម័យកូឌីវ័រដោយបាល់ ១១ម៉ែត្រកាត់សេចក្តី និងយកឈ្នះអតីតជើងឯកឆ្នាំ១៩៧៦ ម៉ារ៉ុក ២-១ នៅម៉ោងបន្ថែមវគ្គ ៨ក្រុមចុងក្រោយ។ អេហ្ស៊ីបថ្វីបើធ្លាប់ឈ្នះជើងឯកច្រើនជាងគេ តែពួកគេខកខានឈ្នះជើងឯកតាំងពីឈ្នះចុងក្រោយនៅឆ្នាំ២០១០ និងឡើងវគ្គផ្តាច់ព្រ័ត្រចុងក្រោយនៅឆ្នាំ២០១៧ តែចាញ់កាមេរូន។
ងាកមកកាមេរូនមុនឡើងមកដល់វគ្គនេះគឺជាក្រុមលេខ ១ ក្នុងពូល A ឡើងមកដល់វគ្គ ១៦ក្រុមចុងក្រោយយកឈ្នះកោះកូម័រ ២-០ និងឈ្នះហ្កាំប៊ី ២-០ នៅវគ្គ ៨ក្រុមចុងក្រោយ។ ២០១៧ ជាព្រឹត្តិការណ៍ចុងក្រោយដែលកាមេរូនឈ្នះជើងឯកលើកទី៥ របស់ខ្លួនដែលយកឈ្នះអេហ្ស៊ីបនេះតែម្តង។ សូមបញ្ជាក់ថា ក្រុមទាំងពីរមានប្រវត្តិជួបគ្នាចុងក្រោយសរុប ២៧លើកដែលរួមមានកាមេរូនឈ្នះ ១៥ ស្មើ ៦ អេហ្ស៊ីបឈ្នះ ៦៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
