បើយោងទៅតាមបុគ្គលម្នាក់ដែលដឹងពីបញ្ហានេះ បានឲ្យដឹងថា សេតវិមានកំពុងពិចារណាពីការមិនបើកប្រាក់ឈ្នួលដល់និយោជិតសហព័ន្ធរយៈពេលជាច្រើនថ្ងៃ ដែលពួកគេត្រូវបានឲ្យសម្រាកបណ្ដោះអាសន្ន ក្នុងអំឡុងពេលមានការបិទប្រតិបត្តិការរដ្ឋាភិបាល ជាចំណាត់ការដែលអាចផ្ទុយនឹងច្បាប់ដែលកំណត់ឲ្យបុគ្គលិកទទួលបានប្រាក់ឈ្នួលវិញ នៅពេលដែលរដ្ឋាភិបាលបើកដំណើរការឡើងវិញ។

ការិយាល័យថវិការបស់សេតវិមានដឹកនាំដោយលោក Russell Vought បានធ្វើសេចក្តីព្រាងអនុស្សរណៈមួយ ដែលបញ្ជាក់ថា កម្មករមិនត្រូវបានធានាសំណង ក្នុងអំឡុងពេលបិទរដ្ឋាភិបាលនេះទេ ជាជំហរដែលបង្កើនហានិភ័យឲ្យមានការប្រឈមមុខដាក់គ្នាជាមួយគណបក្សប្រជាធិបតេយ្យជិតមួយសប្តាហ៍ បន្ទាប់ពីទីភ្នាក់ងារ និងក្រសួងបានផ្អាកប្រតិបត្តិការដែលមិនសំខាន់។

អនុស្សរណៈនេះបង្ហាញពីទឡ្ហីករណ៍ផ្លូវច្បាប់ ដែលច្បាប់ ស្តីពីការប្រព្រឹត្តិដោយយុត្តិធម៌លើនិយោជិតរបស់រដ្ឋាភិបាលឆ្នាំ២០១៩ ដែលត្រូវបានអនុម័តបន្ទាប់ពីដំណើរការបិទរដ្ឋាភិបាល នៅក្នុងអាណត្តិដំបូងរបស់លោកប្រធានាធិបតី Donald Trump ដើម្បីរៀបចំការបង់ប្រាក់ឲ្យបុគ្គលិកសហព័ន្ធ នៅពេលដែលការបិទរដ្ឋាភិបាលបញ្ចប់ គឺមានភាពខ្វះខាត។

សារព័ត៌មាន Axios ដែលបានរាយការណ៍នៅមុននេះ ពាក់ព័ន្ធនឹងអនុស្សរណៈនេះ បានឲ្យដឹងថា មន្ត្រីសេតវិមានមួយចំនួន ជឿថា វិសោធនកម្មច្បាប់នេះអនុញ្ញាតឲ្យមានចន្លោះពេល ដើម្បីសម្រេចថា តើត្រូវផ្តល់ប្រាក់សំណងដល់បុគ្គលិករដ្ឋាភិបាលដែរ ឬយ៉ាងណា។ គណបក្សប្រជាធិបតេយ្យបានបដិសេធយ៉ាងឆាប់រហ័សនូវអនុស្សរណៈនេះ។

គួរបញ្ជាក់ថា លោកប្រធានាធិបតីបានលើកឡើងម្តងហើយម្តងទៀតថា លោកនឹងប្រើការបិទរដ្ឋាភិបាលនេះ ដើម្បីបណ្តេញបុគ្គលិកសហព័ន្ធរាប់ពាន់នាក់បន្ថែមទៀត ដែលជាធម្មតាត្រូវបានបណ្តេញចេញក្នុងអំឡុងពេលបិទរដ្ឋាភិបាល ហើយនាំយកមកវិញនៅពេលដែលដំណើរការនោះបញ្ចប់។ ប៉ុន្តែលោកមានភាពស្រពិចស្រពិល អំពីពេលវេលា សម្រាប់ការកាត់បន្ថយការងារ នៅថ្ងៃចន្ទ ដោយគ្រាន់តែនិយាយថា «នៅចំណុចណាមួយ» វានឹងបើកផ្លូវឲ្យមានការបញ្ឈប់ការងារ៕