បើយោងតាមរបាយការណ៍របស់ប្រព័ន្ធផ្សព្វផ្សាយ បានឲ្យដឹងថា លោក Cristiano Ronaldo បានក្លាយជាកីឡាករបាល់ទាត់ដំបូងគេ ក្នុងប្រវត្តិសាស្ត្រ ដែលរកចំណូលបានជាង ១ពាន់លានដុល្លារ នៅលើមាគ៌ានៃអាជីពរបស់ខ្លួន ដោយបានបង្កើតកំណត់ត្រាថ្មី នៅក្នុងចំណូលកីឡាពិភពលោក។

ខ្សែប្រយុទ្ធសញ្ជាតិព័រទុយហ្គាល់វ័យ ៣៩ឆ្នាំ ដែលបច្ចុប្បន្នប្រកបអាជីពជាមួយក្រុម Al Nassr នៅក្របខ័ណ្ឌ Saudi Pro League របស់ប្រទេសអារ៉ាប៊ីអាអ៊ូឌីត រកបានចំណូលតាមរយៈប្រភពជាច្រើន ដូចជាកិច្ចសន្យាជាមួយក្លិប កិច្ចព្រមព្រៀងផ្សាយពាណិជ្ជកម្មផលិតផលនានា និងការបណ្តាក់ទុនពាណិជ្ជកម្ម។

ប្រាក់ចំណូលក្នុងអាជីពរបស់កីឡាកររូបនេះ រួមមានប្រាក់ឈ្នួលខ្ពស់បំផុតពីក្លិបនានា ដូចជា Manchester United, Real Madrid, និង Juventus ក៏ដូចជាកិច្ចសន្យាបច្ចុប្បន្ន នៅអារ៉ាប៊ីសាអ៊ូឌីត ដែលជាប្រាក់ចំណូលដ៏កាក់កបបំផុត នៅក្នុងវិស័យបាល់ទាត់អាជីព។

ជាមួយគ្នានេះ ប្រាក់ចំណូលក្រៅទីលានរបស់កីឡាករ Ronaldo ក៏ជាការរួមចំណែកដ៏សំខាន់ដល់ឋានៈជាមហាសេដ្ឋីនេះផងដែរ។ រូបគេមានកិច្ចសន្យាពេញមួយជីវិតជាមួយក្រុមហ៊ុន Nike និងជាម្ចាស់ម៉ាកផ្ទាល់ខ្លួន CR7 ដែលរួមមានសម្លៀកបំពាក់ គ្រឿងក្រអូប វ៉ែនតា កន្លែងហាត់ប្រាណ និងសណ្ឋាគារ។

លើពីនោះទៀត វត្តមានបណ្ដាញសង្គមរបស់លោក ដែលមានអ្នកតាមដានជាង ៦០០លាននាក់ នៅលើ Instagram ជួយបន្ថែមប្រាក់ចំណូលពីការផ្សាយពាណិជ្ជកម្ម និងការផ្សព្វផ្សាយផលិតផលធំៗ ដោយការផ្សាយផលិតផលខ្លះមានតម្លៃខ្ពស់ជាងគេបំផុត នៅក្នុងពិភពលោក។

យោងតាមរបាយការណ៍ពីទស្សនាវដ្ដី Forbes បានឲ្យដឹងថា ទាំងប្រាក់ចំណូលលើទីលាន និងក្រៅទីលានរួមបញ្ចូលគ្នារបស់ Ronaldo ឥឡូវនេះ បានមានលើសពី ១ពាន់លានដុល្លារ ដែលធ្វើឲ្យរូបគេក្លាយជាកីឡាករបាល់ទាត់កំពុងប្រកបអាជីពដំបូងគេដែលរកប្រាក់ចំណូលបានដល់កម្រិតនេះ៕