អង្គការយូនីសេហ្វ (UNICEF)បាននិយាយកាលពីថ្ងៃពុធ ទី៨ តុលា ថា អំពើហិង្សាដែលនៅតែបន្តកើនឡើងក្នុងប្រទេសហៃទី បានជម្លៀសកុមារចំនួន៦៨ម៉ឺននាក់ ដែលកើនឡើងជិតពីរដងកាលពីឆ្នាំមុន ខណៈក្រុមប្រដាប់អាវុធរឹតបន្តឹងការគ្រប់គ្រង និងសេវាសាធារណៈដួលរលំ។   

ទីភ្នាក់ងារនេះ បានប៉ាន់ប្រមាណថាមនុស្សជាង ៦ លាននាក់ ច្រើនជាងពាក់កណ្តាលនៃចំនួនប្រជាជនសរុប រួមទាំងកុមារ៣,៣ លាននាក់ ឥឡូវនេះត្រូវការជំនួយមនុស្សធម៌។    

ការកើនឡើងនៃការភៀសខ្លួនចេញពីទីលំនៅ រួមជាមួយនឹងសេវាសុខភាព និងការអប់រំកាន់តែយ៉ាប់យ៉ឺន និងការកើនឡើងនៃអំពើហិង្សារបស់ក្រុមជនអន្ធពាល បញ្ជាក់ពីហានិភ័យកើនឡើងដល់ប្រជាជនហៃទីរាប់លាននាក់ ជាពិសេសកុមារ។   

យោងតាមអង្គការ UNICEF កុមារជាង ១ លាននាក់ប្រឈមកម្រិតធ្ងន់ធ្ងរនៃអសន្តិសុខស្បៀង។ កុមារប្រហែល ២៨៨.៥០០ នាក់ដែលមានអាយុក្រោម ៥ ឆ្នាំត្រូវបានគេព្យាករណ៍ថានឹងទទួលរងពីកង្វះអាហារូបត្ថម្ភធ្ងន់ធ្ងរក្នុងឆ្នាំ ២០២៥។ មនុស្សប្រហែល២,៧ លាននាក់កំពុងរស់នៅក្នុងតំបន់គ្រប់គ្រងដោយក្រុមប្រដាប់អាវុធ ខណៈការភៀសខ្លួនចេញពីទីលំឋានក្នុងប្រទេស បានកើនឡើងដល់ ២៤៦.០០០នាក់ រហូតមកដល់ពេលនេះនៅឆ្នាំនេះ។

ទីភ្នាក់ងារនេះបានព្រមានថា មនុស្សជាង១,៣ លាននាក់ត្រូវបានបង្ខំឱ្យចាកចេញពីផ្ទះសម្បែងរបស់ពួកគេ ដោយកុមារទទួលរងវិបត្តិកាន់តែខ្លាំង។   

ក្រុមជនអន្ធពាលប្រដាប់អាវុធបានពង្រីកការគ្រប់គ្រងរបស់ពួកគេនៅទូទាំងផ្នែកធំៗ នៃប្រទេសហៃទី ដោយមានកម្លាំងនគរបាលក្នុងតំបន់យ៉ាងច្រើនលើសលប់ និងជំរុញក្រុមមនុស្សធម៌ឱ្យពង្រីកប្រតិបត្តិការឡើងវិញ៕