ប្រភពមួយដែលដឹងសេចក្ដីលម្អិតនៃកិច្ចព្រមព្រៀងបាននិយាយថា ចំណាប់ថ្នូរអ៊ីស្រាអែល អាចនឹងត្រូវបានដោះលែងលឿនបំផុតនៅថ្ងៃសៅរ៍ ចុងសប្ដាហ៍នេះ ក្រោមផែនការសន្តិភាពរបស់សហរដ្ឋអាមេរិក ដើម្បីបញ្ចប់សង្រ្គាមនៅតំបន់ហ្កាហ្សា ហើយយោធាអ៊ីស្រាអែល នឹងបញ្ចប់ដំណាក់កាលទីមួយនៃការដកទ័ពចេញមួយផ្នែកពីតំបន់ហ្កាហ្សា ក្នុងពេល ២៤ម៉ោង ក្រោយកិច្ចព្រមព្រៀងត្រូវចុះហត្ថលេខា។

ការចុះហត្ថលេខាលើដំណាក់កាលដំបូងនៃកិច្ចព្រមព្រៀងហ្កាហ្សា ដែលផ្តួចផ្តើមឡើងដោយលោកប្រធានាធិបតីអាមេរិក Donald Trump ត្រូវបានរំពឹងថានឹងប្រព្រឹត្តទៅនៅម៉ោងក្នុងស្រុក ១២ថ្ងៃត្រង់នៅអ៊ីស្រាអែល (ត្រូវនឹងម៉ោងសកល ០៩:០០ GMT) នាថ្ងៃព្រហស្បតិ៍ ទី៩ ខែតុលា នេះ។

ដោយឡែក លោក Trump បានប្រាប់ទូរទស្សន៍ Fox News កាលពីថ្ងៃពុធ បន្ទាប់ពីប្រកាសកិច្ចព្រមព្រៀងរវាងអ៊ីស្រាអែល និងក្រុមហាម៉ាសថា ចំណាប់ថ្នូរនឹងត្រូវដោះលែងនៅថ្ងៃចន្ទសប្ដាហ៍ក្រោយ។

ប្រជាជនអ៊ីស្រាអែល និងប៉ាឡេស្ទីន បានត្រេកអរជាខ្លាំង បន្ទាប់ពីលោក Trump បានប្រកាសថា កិច្ចព្រមព្រៀងបទឈប់បាញ់ និងចំណាប់ថ្នូរត្រូវសម្រេចបានហើយ ក្រោមដំណាក់កាលដំបូងនៃផែនការរបស់លោក ដើម្បីបញ្ចប់សង្រ្គាមហ្កាហ្សា ដែលសម្លាប់មនុស្សជាង ៦៧.០០០នាក់ និងផ្លាស់ប្តូរតំបន់មជ្ឈិមបូព៌ាទាំងមូល៕