ស្វាយរៀង ៖ តំណាងពលរដ្ឋភូមិសំយ៉ោង ឃុំសំយ៉ោង ស្រុកកំពង់រោទិ៍ ខេត្តស្វាយរៀង លោក ប៊ន ប៊ូ នៅដើមខែតុលា ឆ្នាំ២០២៥ នេះ បានស្នើដល់ ក្រុមហ៊ុនដែលដេញថ្លៃធ្វើផ្លូវ ក្រុមហ៊ុន ពេជ្រ ធីតា សុំក្រុមហ៊ុនធ្វើការជួសជុលកែលម្អផ្លូវឡើងវិញ សម្រាប់ប្រើប្រាស់ ខណៈដែលផ្លូវ ១ខ្សែ ប្រភេទបេតុង ឆ្អឹងដែក មានកម្រាស់១តឹកកន្លះ ដែលក្រុមម៉ៅការធ្វើឆ្លងកាត់ភូមិមិនទាន់បាន ១ឆ្នាំផង ផ្លូវត្រូវបានរងការខូចខាតយ៉ាងធ្ងន់ធ្ងរ ក្នុងនោះមានកន្លែងខ្លះដែកបានផុសចេញក្រៅបេតុងល្បាយស៊ីម៉ង់ និងខ្សាច់ខ្ចាត់ខ្ចាយពេញតាមដងផ្លូវសល់តែក្បាលថ្មផុសចេញ។

​លោក ទេព សាវី មេឃុំសំយ៉ោង បានបញ្ជាក់ឲ្យដឹងថា ពាក់ព័ន្ធទៅនឹងពលរដ្ឋស្នើសុំឲ្យក្រុមហ៊ុនធ្វើការជួសជុលផ្លូវឡើងវិញនោះ រដ្ឋបាលឃុំ បានចុះពិនិត្យស្ថានភាព នឹងវាយតម្លៃផលខូចខាតផ្លូវរួចរាល់ហើយ ខណះដែលផ្លូវមួយខ្សែនេះនៅក្នុងគម្រោងថែទាំ បច្ចុប្បន្នរដ្ឋបាលឃុំ បានណែនាំដល់ក្រុមអ្នកម៉ៅការស្ថាបនាផ្លូវធ្វើការជួសជុលតាមគម្រោង ដោយចាក់បេតុងកម្រាស់០.០៦ម៉ែត្រ ដើម្បីលុបគ្រួស និងដែកដែលអណ្ដែតចេញក្រៅពីបេតុង គ្រប់កន្លែង ដើម្បីបញ្ចប់គម្រោងកសាងផ្លូវឆ្នាំ២០២៤។

ពាក់ពន្ធ័គុណភាពផ្លូវបេតុងឆ្អឹងដែក ដែលរដ្ឋបាលខេត្ត ស្រុក ក្រុង ស្ថាបនា តាមរយះថវិកាមូលនិធិឃុំ សង្កាត់ ប្រចាំឆ្នាំ មានសុពលភាពប្រើប្រាស់ប៉ុន្មានឆ្នាំ BTV បានព្យាយាមសាកសួរទៅក្រុមកាងារបច្ចេកទេសរបស់រដ្ឋបាលខេត្ត ជាច្រើនលើកដើម្បីសុំការពន្យល់ពីគុណភាពដែរ តែទូរសព្ធ័ហៅចូលគ្មានការឆ្លើយតប ៕ ដោយ ៖ ភា សារិត